Քննարկվեց ՀՀ ԶՈՒ կարգապահական կանոնագիրքը

Այսօր ԱԺ-ում խորհրդարանական լսումներ էին. քննարկվում էր ՀՀ զինված ուժերի կարգապահական կանոնագրքի մասին ՀՀ օրենքի նախագիծը:

ԱԺ պաշտպանության, ազգային անվտանգության եւ ներքին գործերի մշտական հանձնաժողովի նախագահ Հրայր Կարապետյանը նշեց, որ այս լսումները երկար ճանապարհ ունեն անցնելու, որ օրենք դառնան: «Այսօր մեր ԶՈՒ կարգապահական փոխհարաբերությունները կարգավորվում են 1996 թվականի կառավարության որոշմամբ եւ դրանից բխող այլ հրամաններով ու ակտերով: Ժամանակն է, որ զինված ուժերում բոլոր տեսակի փոխհարաբերությունները կարգավորվեն օրենքով»,- ասաց նա:

Պաշտպանության փոխնախարար Արա Նազարյանը տեղեկացրեց, որ, ի թիվս այլ հարցերի, մտցվել է զինծառայողների նկատմամբ կիրառվող կարգապահական տույժի նոր տեսակ` կարգապահական վաշտ ուղարկելը, որի գործառութային առանձին բաղադրիչներ դեռեւս հստակեցման կարիք ունեն:

ՀՀ ՊՆ իրավաբանական վարչության պետի տեղակալ Սասուն Սիմոնյանը հանգամանորեն ներկայացրեց  օրինագիծը եւ անդրադարձավ ԵԱՀԿ/ԺՀՄԻԳ փորձագետների առաջարկներին:

Հիշեցնենք, որ օրինագիծը ուղարկվել է նաեւ միջազգային փորձաքննության. ԵԱՀԿ երեւանյան գրասենյակը ընդառաջել է հանձնաժողովին` օրինագծի վերաբերյալ ներկայացնելով փորձագիտական կարծիք: