Աստծո առաջ պատասխան կտան

Փետրվարի 28-ին կնշվի սումգայիթյան ջարդերի 23-րդ տարելիցը: Այսօր այդ առիթով լրագրողների հետ հանդիպեցին հայկական կոտորածների ականատեսները:

Վերհիշելով սարսափազդու դեպքերը` նրանք դարձյալ համոզմունք էին հայտնում, որ դրանք Ադրբեջանի կողմից ծրագրված քայլեր էին:

Ռոման Թովմասյանը սումգայիթյան ջարդերի ժամանակ հինգ տարեկան է եղել, սակայն հիշում ու պատմում է,  թե ինչպես են սպանել իր ընտանիքի տղամարդկանց։ «Աստծո առաջ պատասխան են տալու»,- համոզված է նա:

Նրա մայրը ՝ Ռայա Թովմասյանը,  պատմում է, թե ինչպես է ամուսինը ինը ժամ շարունակ պայքարել իրենց բնակարան ներխուժած ադրբեջանցիների դեմ:

Ջարդերի ականատես Կարինե Մելքումյանն էլ հիշում է, թե ինչպես են ադրբեջանցիները մեկ օրվա ընթացքում երեք անգամ ներխուժել իրենց տուն ու թալանել, իսկ իրենք հրաշքով են փրկվել: Հիշում է նաեւ, որ զանգել են ոստիկանություն, սակայն այնտեղից չեն արձագանքել: Չեն օգնել նաեւ զինվորները` ասել են «միջամտելու հրաման չունենք»: «Սպանում էին ինչով պատահի»,- պատմում է նա եւ նշում,  որ ադրբեջանցիները բարձրախոսներով գոռում էին` «Մահ հայերին»:

Ասուլիսին մասնակցում էր նաեւ ԱԺ «Ժառանգություն» խմբակցության քարտուղար Լարիսա Ալավերդյանը: Նրա խոսքերով` Ադրբեջանում տեղի ունեցած դեպքերը ցեղասպանություն են. «Ադրբեջանը պետք է ցեղասպանություն ծնող և իրականացնող պետություն ճանաչվի»: