ԿԱՊԻՏԱԼ. Աղանբեկյանը կգլխավորի Ռուսաստանի միացյալ բորսան

ՄՄՎԲ-ի (Մոսկվայի միջբանկային արժութային բորսա) նախագահ Ռուբեն Աղանբեկյանը կգլխավորի ՄՄՎԲ-ի և ՌԱՀ-ի (Ռուսական առևտրային համակարգ) միավորման արդյունքում ստեղծված միասնական բորսան։ Այս մասին բորսաների միավորման փաստաթղթի ստորագրման արարողությանը հայտարարել է Աղանբեկյանը։

«Ես կլինեմ ղեկավարը, իսկ ՌԱՀ-ի նախագահ Ռոման Գորյունովը` իմ առաջին տեղակալը. նա պատասխանատու կլինի միասնական բորսայի զարգացման համար»,- ասել է Աղանբեկյանը։

ՄՄՎԲ-ն կգնի ՌԱՀ-ի վերահսկիչ փաթեթը $1,15 մլրդ-ով։ Համաձայնագրի ստորագրումը հետաձգվում էր պայմանագրի մանրամասների շուրջ համաձայնության բացակայության պատճառով։ ՄՄՎԲ-ն Ռուսաստանում, ԱՊՀ և Արևելյան Եվրոպայի երկրներում ամենախոշոր ունիվերսալ բորսաներից մեկն է։

2010թ. տվյալների համաձայն` ՄՄՎԲ-ն ունի վեց բաժնետեր, որոնցից են «Ցենտրոբանկը», «Յունիկրեդիտ բանկը», «Սբերբանկը»։

ՌԱՀ-ի ֆոնդային բորսան տեղծվել է 1995թ.։ 2007թ. այն դարձել է Ռուսաստանում առաջին և աշխարհում վեցերորդ բորսան` ըստ IPO-ի ընթացքում ներգրավված միջոցների: