Թուրքիան պարում է Ադրբեջանի դուդուկի տակ

Թուրքիան հայ-թուրքական հարաբերություններն ուղղակիորեն կապում է Արցախի հիմնախնդրի հետ: Սա հաստատել են թե՜ Թուրքիայի նախագահ Գյուլը, թե՜ արտգործնախարար Դավութօղլուն ԵԽԽՎ-ում հայաստանյան պատվիրակության անդամ Նաիրա Զոհրաբյանի տրված հարցին պատասխանելու ժամանակ:

Այս տարվա հունվարի 24-28-ը անցկացված ԵԽԽՎ նստաշրջանի ժամանակ Ն. Զոհրաբյանը, դիմելով Դավութօղլուին, ասել է, որ ակնհայտ է,  որ Ադրբեջանի ուղղակի ճնշմամբ Թուրքիան հայ-թուրքական հարաբերությունները փակուղի մտցրեց, եւ  հարցրել, թե այժմ ի՞նչ երաշխիքներ կարող են ունենալ ԵԽ անդամ պետությունները, որ այս անգամ եւս Թուքրիան, որը նախագահում է ԵԽ նախարարների խորհուրդը,  որեւէ երրորդ երկրի ճնշմամբ չի առաջնորդվի` անտեսելով ԵԽ համամարդկային հիմնարար արժեքները:

«Նա խուսափեց խոսել Ադրբեջանի ուղղակի ճնշման մասին, բայց իր պատասխանով հաստատեց այն, ինչը ես ասել էի հարցիս մեջ»,- ասաց Ն. Զոհրաբյանը:

Ն. Զոհրաբյանը Ցեղասպանության մասին հարց է ուղղել նաեւ նախագահ Գյուլին, որը մասնակցել է ԵԽԽՎ բոլոր նիստերին: Վերջինս նախ ասել է, թե իր համար անընդունելի է «ցեղասպանություն» եզրույթը եւ նորից առաջարկել է այն, ինչը միշտ են առաջարկում` ստեղծել հանձնաժողով, բացել բոլոր արխիվները, քննել Ցեղասպանության իրողության հարցը:

Գյուլն ասել է, թե այդ հանձնաժողովն ինչ եզրահանգման էլ գա, այն ընդունելի կլինի Թուրքիայի համար, քանի որ հզոր պետությունը պետք է քաջություն ունենա իր անցյալն ընդունելու: