Տնտեսության զարգացումն առանց շրջակա միջավայրի աղտոտման հնարավոր չէ

«Եթե տնտեսությունը զարգանում է, ապա ակնհայտ է, որ դա չի կարող բացասական ազդեցություն չունենալ շրջակա միջավայրի վրա»,- այսօր հայտարարել է ՀՀ բնապահպանության նախարարի առաջին տեղակալ Սիմոն Պապյանը:

Անդրադառնալով Կապանի Շահումյան եւ Բանավան թաղամասերի բազմամետաղային հանքի` բաց եղանակով շահագործման խնդրին, Պապյանը նկատել է .«Պետք է աշխատենք այնպես անել, որ վնասակար ազդեցությունը շրջակա միջավայրի վրա հնարավորինս մեղմենք: Այսօր ասել, որ ընդերքի շահագործման կարիքը չունենք, սխալ կլինի, սակայն  եթե բնապահպանության նախարարությունը հաշվարկի, որ դա մաքսիմալ վնասակար ազդեցություն է թողնելու շրջակա միջավայրի վրա, բացասական եզրակացություն կտա, այնպես, ինչպես եղավ Սոթքի դեպքում, երբ պատրաստվում էին ոսկու կորզման ֆաբրիկա կառուցել»:

Նշենք, որ Կապանի բազմամետաղային հանքի սեփականատեր «Դինո Գոլդ Մայնինգ» ընկերությունը նախատեսում է մինչև տարեվերջ հանքավայրը բաց եղանակով շահագործել, ինչն, ըստ բնապահպանների, էկոլոգիական և առողջապահական լրջագույն խնդիրներ կառաջացնի Սյունիքում։