"Աննա" սերիալը` 3-րդ եթերաշրջան չի ունենա

Այսօր լրագրողների հետ հանդիպման ժամանակ Հանրային Հեռուստառադիոընկերության խորհրդի նախագահ Ալեքսան Հարությունյանը ամփոփեց, թե ինչպիսին էր նախորդ տարին հեռուստառադիոընկերության համար: Նա նշեց. «Տնտեսական ճգնաժամի ազդեցությունից գրեթե դուրս եկանք, կարողացանք ապահովել մեծ հեռուստալսարան, կարեւոր էին նաեւ գեղարվեստական եւ փաստավավերագրական ֆիլմերի նկարահանումները, ինչը շարունակվելու է նաեւ այս տարի»:

Ալ.Հարությունյանը տեղեկացրեց, որ 2011-ին «Աննա» հեռուստասերիալի 3-րդ եթերաշրջան չի սպասվում: Փոխարենը` կան նոր ֆիլմեր էկրանավորելու նախագծեր, մասնավորապես` սկսվել է համագործակցությունը Հրանտ Վարդանյանի հետ Պերճ Պռոշյանի «Հացի խնդիր» վեպի էկրանավորման համար:

Հարցին, թե սերիալները արդյոք չեն որակազրկում եթերը, Ալ.Հարությունյանը ասաց, թե դրանք մոտ 60 տոկոս հեռուստալսարան են ապահովել եւ հեռուստադիտողն է որոշում դիտի տվյալ ֆիլմը, թե` ոչ: