Նոր քաղաքապետի կադրային փոփոխությունները շարունակվում են

Մեզ հասած տեղեկություններով` այսօր աշխատանքից ազատվել է Երեւանի գլխավոր ճարտարապետ Սամվել Դանիելյանը:

Պարզաբանումներ հարցի շուրջ Երեւանի քաղաքապետարանի մամլո ծառայությունից այս պահին հրաժարվեցին տալ`պատճառաբանելով, որ գործն իրավաբանական ընթացքի մեջ է եւ միայն դրա ավարտից հետո լրատվամիջոցներին առավել հանգամանալից տեղեկատվություն կտրամադրվի: Քաղաքապետի մամուլի քարտուղար Շուշան Սարդարյանը մեզ հետ հեռախոսազրույցում ընդամենը հաստատեց վերոնշյալ տեղեկությունը` դեռեւս չհրապարակելով գլխավոր ճարտարապետի նոր թեկնածուի անունը: Ի դեպ, իր պաշտոնավարման սկզբում  քաղաքապետի պարտականությունները ստանձնած Կարեն Կարապետյանը խոստացել էր զերծ մնալ կադրային ջարդ իրականացնելուց, սակայն միայն մեկ օրվա ընթացքում  պաշտոնանկության երկու դեպքերը  հակառակն են ասում:

Հիշեցնենք, որ այսօր առավոտյան պաշտոնանկ է արվել նաեւ Արաբկիր վարչական շրջանի ղեկավար Համլետ Մարգարյանը: Նրան այդ պաշտոնում փոխարինելու է Էդիկ Մուշեղյանը` «Կյաժ Էդոն»,  որը նեղ շրջանակներում հայտնի է որպես նորանշանակ քաղաքապետի մանկության ընկեր: