Կադրային նոր քաղաքականություն դպրոցներում

2010 թվականի ընթացքում կրթության ոլորտը եղել է ոչ միայն իշխանությունների, այլեւ հասարակության համակ ուշադրության կենտրոնում, եւ կրթության ու գիտության նախարարությունը արձագանքել է յուրաքանչյուր ահազանգին, դիմումին ու բողոքին:

Կրթագիտական տարին այսօր ամփոփեց ԿԳ նախարար Արմեն Աշոտյանը:

Հայաստանյան համայնքների 2/3-ում մինչ այժմ չկան նախակրթարաններ: Համաշխարհային բանկի վարկային ծրագրով այս տարվա ընթացքում Արագածոտնի եւ Արարատի 41 համայնքում ստեղծվել են նախակրթարաններ, որտեղ կարող են այցելել ավագ նախադպրոցական տարիքի երեխաները:

Ըստ Աշոտյանի` հանրակրթության ոլորտի ձեռբերումներից է դպրոցի տնօրենների վերապատրաստման եւ հավաստագրման եւ ուսուցիչների ատեստավորման կարգի ընդունումը:

Այժմ հանրապետությունում 5 կազմակերպություն անց է կացնում տնօրենների վերապատրաստման դասընթացներ: Հունվարի 15-ին նախարարությունում վերապատրաստված տնօրենները քննություն են տալու եւ դրական արդյունքի դեպքում ստանալու են տնօրեն աշխատելու հավաստագիր:

Մինչ այժմ բոլոր ուսուցիչները վարձատրվել են միեւնույն չափով` անկախ իրենց աշխատանքային փորձից ու մասնագիտական հմտություններից. «Ատեստավորման մեխանիզմները թույլ կտան լավագույններին վարձրատրել ավելի շատ եւ խրախուսման միջոցներ ստեղծել մասնագիտական կատարելագործման համար»,- ասաց Ա. Աշոտյանը:

Այս տարի ավագ դպրոցների թիվն ավելացել է 43-ով: Տպագրվել են նոր դասագրքեր ավագ դպրոցների համար, որոնք, նախարարը կարծում է, հասարակության կողմից դժգոհության տեղիք չեն տա:

Հայաստանցի աշակերտները մասնակցել են 7 միջազգային օլիմպիադայի եւ բերել են 7 մեդալ, ինչը նույնպես նախարարը ձեռքբերում է համարում. «Սա վկայում է հանրակրթության ոլորտի  բարձր որակի եւ մեր երեխաների աստվածատուր տաղնադի մասին»:

Կադրային փոփոխություններ եւ բարեփոխումներ են կատարվել հատուկ դպրոցներում եւ ներառական կրթության ոլորտում:

Եվրամիության աջակցությամբ 12 նախնական եւ միջին մասնգիտական կրթական ուսումնական հաստատություններում բարեկարգման աշխատանքները: Այս հաստատությունները հավակնում են դառնալ տարածաշրջանային բազմաֆունկցիոնալ կենտրոններ: 

Նախարարության կողմից մշակվել եւ ներդրվել են մասնագիտական կրթական պետական չափորոշիչներ` 80 մասնգիտությունների գծով: