Հայաստանում բիզնես անելը հերոսություն է

Փոքր եւ միջին բիզնեսի զարգացման ոլորտում  որակական առումով տեղաշարժ չկա: Այսօր լրագրողների հետ հանդիպման ժամանակ այս կարծիքն արտահայտեց Բիզնեսի աջակցման կենտրոնի տնօրեն Սամվել Գեւորգյանը:

Նրա խոսքերով` պետք է խոսել ոչ թե ձեռնարկությունների քանակի մասին, այլ թե դրանցից որոնք են մրցունակ շուկայում, քանի որ ներկայումս գրանված մոտ 150 հազար ձեռնարակություններից ռեալ կերպով աշխատում է միայն 25 տոկոսը:

«Թվերի հետ խաղալը հեշտ է: Անցյալ տարի արտահանել ենք երկու ձմերուկ, այս տարի երեքը: Դուրս է գալիս, որ արտահանման 50 տոկոս ա՞ճ կա»:

Ս. Գեւորգյանի խոսքերով` այսօր հատկապես սննդամթերքի շուկայում, բացի մի քանի ապրանքատեսակից, հայաստանյան արտադրանքը մրցունակ չէ. «Սուպերմարկետներում մետրերով արտասահամանյան ապրանք է ներկայացված, իսկ մի անկյունում հայկականն է»:

Ս. Գեւորգյանը հիշեց, որ մի քանի տարի առաջ Ռոտերդամում կոնֆերանսի ժամանակ անգլիացի մասնագետը նշել է, թե Արեւելյան Եվրոպայի երկրներում բիզնես անելը հերոսություն է համարվում, եւ մինչեւ չդադարի այն հերոսություն համարվել, բիզնեսը չի զարգանալու նորմալ տեմպերով: