Ջղայնանալը՝ հեղինակային իրավունքի պաշտպան

Հեղինակային իրավունքի մերժումը գործելակերպ դարձրած 70 կայք է փակվել վերջին տարիներին: Դրանում ինչպես հեղինակները, այնպես էլ արտադրող-ձայնագրող ստուդիաներն իրենց ներդրումն ունեն: Սա փաստումն է Armenian music centre ընկերության ղեկավար Սամվել Ամիրաքյանի, որը նաև հավատացած է. «Դաշտը վերահսկելի է, ընդամենը պետք է մի լավ «ջղայնանալ»:

Անհրաժեշտ չափով «ջղայնանալու» համար Հայաստանում օրենսդրությունն է թերի, համարյա՝ բացակա, Հայաստանից դուրս էլ՝ կամ դիվանագիտական հարաբերությունները, կամ միլիոնավոր դոլարները, որ արժենում են դատական գործընթացները: Սա գիտակցում ու բարձրաձայնում է Սամվել Ամիրաքյանը, բայց եւ ընդգծում. «Ուզում եմ իմ երկրում հնարավորինս հաջողակ բիզնես ունենալ և լինել բարեխիղճ հարկատու»:

Նշյալ ոլորտում պաշտպանության ապահովմանն է կոչված նաև ՄԱԿ-ի հայկական ասոցիացիան, որի փոխտնօրեն Արամ Ոսկանյանի փաստմամբ՝ կառույցը հենց հեղինակային և մտավոր սեփականության իրավունքին անմիջականորեն ուղղված ծրագրեր չի իրականացնում. «Խնդիրը դիտարկում ենք մարդու իրավունքների տեսանկյունից և լուծումն էլ տեսնում հասարակության մեդիագրագիտության բարձրացման համատեքստում»: