Ես սահմանադրական իրավունքի մասնագետ եմ, ոչ թե քրեական իրավունքի. Գագիկ Հարությունյանը՝ Քոչարյանին առաջադրված մեղադրանքի մասին

Այդպիսի հարցերը պետք է տալ համապատասխան մասնագետներին. իրավաբանության մեջ կա ավելի քան 10 ճյուղ, ես սահմանադրական իրավունքի մասնագետ եմ, ոչ թե քրեական իրավունքի: Այսպես արձագանքեց Բարձրագույն դատական խորհրդի նախագահ Գագիկ Հարությունյանը հարցին, թե Յուրի Խաչատուրովին, Ռոբերտ Քոչարյանին և մյուսներին առաջադրվել է մեղադրանք, որից ժամանակին հրաժարվել են «7-ի գործով» դատախազները, արդյո՞ք այստեղ խնդիր կա, թե՞ ոչ:

«Քրեական իրավունքի մասնագետներին հարցրեք, նրանք կպատասխանեն: Սահմանադրական իրավունքն այս հարցի վերաբերյալ ունի հետևյալ մոտեցումը՝ ցանկացած հարցի լուծում պետք է համապատասխանի սահմանադրական հիմնարար սկզբունքներին, այսինքն՝ եթե դա վերաբերում է իրավունքների սահմանափակմանը, պետք է լինի օրենքով, համաչափ, չխաթարի իրավունքի էությունը: Եթե որևէ գործողություն լինի, որ սրանց չի համապատասխանի, այդ ժամանակ գնահատական կտանք»,- ասաց Գագիկ Հարությունյանը:

Դիտարկմանը, որ Մարտի 1-ի գործով հարցաքննվել է արդարադատության իրականացմանը խոչընդոտելու մասով, նա արձագանքեց. «Արդարադատության իրականացմանը ՍԴ նախագահը չէր կարող խոչընդոտել»: 

Հակադարձմանը, որ Ռոբերտ Քոչարյանի պաշտպաններն ասում են, որ դատական մարմինների նկատմամբ ճնշումներ կան, ԲԴԽ-ին նման ահազանգեր եղե՞լ են,  Հարությունյանը պատասխանեց՝ ոչ:

«Մենք պարբերաբար դատավորներին հիշեցնում ենք՝ եթե նման իրավիճակ կա, անպայման տեղեկացրեք ԲԴԽ-ին, եթե տեղյակ չեք պահում, ապա հնարավոր է ձեր նկատմամբ կարգապահական վարույթ լինի: Մինչ այժմ նման հարցադրում չէր եղել, միայն վերջերս եղավ մի հարցադրում՝ կապված քաղաքի դատարանի նախագահի և Վերաքննիչ դատարանի անդամի ինչ-ինչ հեռախոսային զրույցի հետ: Սա հրապարակվել էր մամուլում, այդ հարցով քաղաքի դատարանի նախագահը դիմեց իրավապահներին, հիմա գործ է քննվում»,- հայտնեց նա: