Քուշկյանը չի հրաժարվել պաշտոնից

Լուրեր են պտտվում, թե ՀՀ առողջապահության նախարար Հարություն Քուշկյանը աշխատանքից ազատվելու դիմում է գրել: Եվ նրա` դեռեւս ոչ թափուր պաշտոնին հավակնող թեկնածուն է Երեւանի պետական բժշկական համալսարանի ռեկտոր Գոհար Քյալյանը:

Շրջանառվող լուրի հավաստիություն ճշտելու նպատակով դիմեցինք առողջապահության նախարարի մամուլի քարտուղար Շուշան Հունանյանին: Վերջինս ասաց, որ այդ լուրերն իրականությանը չեն համապատասխանում, եւ Հարություն Քուշկյանը աշխատում է իր պաշտոնում:

Ենթադրվում է, որ այս խոսակցությունների առիթ կարող էին լինել այն, որ երկու շաբաթ առաջ ՀՀ վարչապետը դիտողություն էր արել մի քանի նախարարների եւ պահանջել էր 10-օրյա ժամկետում հակակոռուպցիոն միջոցառումների ժամանակացույց ներկայացնել:

Կառավարության այսօրվա նիստում վարչապետ Տիգրան Սարգսյանն այս կապակցությամբ ասել է. «Մենք երեկ առողջապահության նախարար պարոն Քուշկյանի հետ քննարկել ենք նախարարության կողմից մշակված միջոցառումների ծրագիրը, որը հաջորդ շաբաթ պետք է ներկայացվի հանրության դատին: Այդ փաստաթղթերը կտեղադրվեն կառավարության եւ նախարարության կայքէջերում, եւ մենք հանրային քննարկումներ կծավալենք այդ ուղղությամբ»: