Պաշտոնապես բացվել է Բաքու–Թբիլիսի–Կարս երկաթուղին

Եվրոպան և Ասիան Հարավային Կովկասի միջոցով կապող Բաքու–Թբիլիսի–Կարս (ԲԹԿ) երկաթուղային գիծը պաշտոնապես շահագործման է հանձնվել ամբողջ ծավալով։ Վրաստանի, Ադրբեջանի և Թուրքիայի համատեղ իրականացրած նախագիծը համարվում է Միջին միջանցքի կարևորագույն տրանսպորտային երթուղիներից մեկը։  Գրում է vectornews.ge-ը։

Վրաստանի վարչապետ Իրակլի Կոբախիձեն ԲԹԿ-ն անվանել է պատմական նախագիծ և երեք երկրների հաջող համագործակցության լավագույն օրինակ։ Նրա խոսքով՝ Վրաստանի առաջնահերթություններից են տարանցիկ ներուժի զարգացումն ու միջազգային կապակցվածության ամրապնդումը։

Ադրբեջանի թվային զարգացման և տրանսպորտի նախարար Ռաշադ Նաբիևը նշել է, որ նախագծի գաղափարը սկիզբ է առել Ադրբեջանի համազգային առաջնորդ Հեյդար Ալիևի տեսլականից, որը Վրաստանը, Ադրբեջանն ու Թուրքիան դիտարկում էր որպես ռազմավարական գործընկերներ։

Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն ընդգծել է, որ ԲԹԿ-ն ոչ միայն բեռնափոխադրումների այլընտրանքային ուղի է, այլև համաշխարհային նշանակության ռազմավարական երկաթուղային հանգույց և անվտանգ միջազգային տրանսպորտային միջանցք։

Վրաստանի էկոնոմիկայի և կայուն զարգացման նախարար Մարիամ Քվրիվիշվիլին հայտարարել է, որ երկաթուղու լիարժեք գործարկումը կարևոր նշանակություն ունի ամբողջ տարածաշրջանի համար և ցույց է տալիս, թե ինչպես է տարածաշրջանային համագործակցությունը նպաստում խաղաղությանը, կայունությանը և տնտեսական զարգացմանը։

Նրա խոսքով՝ Բաքու–Թբիլիսի–Կարս երկաթուղին Վրաստանի երկարաժամկետ տրանսպորտային ռազմավարության կարևոր մասն է՝ Անակլիայի խորջրյա նավահանգիստի, երկաթուղային համակարգի արդիականացման և Արևելք–Արևմուտք ավտոմայրուղու նախագծերի հետ միասին։ Քվրիվիշվիլին նշել է նաև, որ 2025 թվականին Վրաստանի տարածքով Չինաստանի և Ղազախստանի միջև կոնտեյներային փոխադրումները աճել են 33 տոկոսով, իսկ ԲԹԿ երթուղով փոխադրված կոնտեյներների քանակը գրեթե վեց անգամ գերազանցել է նախորդ տարվա ցուցանիշը։

Բաքու–Թբիլիսի–Կարս երկաթուղու վրացական հատվածի՝ Մարաբդայից մինչև Թուրքիայի սահմանին գտնվող Կարծախի հատվածի շահագործումն ապահովելու նպատակով ստեղծվել է վրաց-ադրբեջանական համատեղ ձեռնարկություն։ Այդ հատվածում փոխադրումների բացառիկ օպերատորը հանդիսանում է Վրացական երկաթուղի ընկերությունը։

Նախագծի շրջանակում վերակառուցվել է գործող երկաթուղային ենթակառուցվածքի 153 կիլոմետրը, իսկ 27 կիլոմետր երկարությամբ կառուցվել է եվրոպական չափանիշներին համապատասխան նոր երկաթուղային գիծ։ Նախագծի լիարժեք գործարկումից հետո երթուղու տարեկան թողունակությունը կհասնի 5 միլիոն տոննայի, ինչը զգալիորեն կուժեղացնի տարածաշրջանի տարանցիկ ներուժն ու Միջին միջանցքի դերը Եվրոպայի և Ասիայի միջև առևտրում։

Երկաթուղու պաշտոնական բացման արարողությանը մասնակցել են Վրաստանի վարչապետ Իրակլի Կոբախիձեն, Ադրբեջանի թվային զարգացման և տրանսպորտի նախարար Ռաշադ Նաբիևը, Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն, ինչպես նաև Հայաստանի տարածքային կառավարման և ենթակառուցվածքների նախարար Դավիթ Խուդաթյանը։ Միջոցառմանը ներկա են եղել նաև Վրաստանի, Ադրբեջանի, Թուրքիայի և Հայաստանի տրանսպորտային ու երկաթուղային գերատեսչությունների, ինչպես նաև նախագծի իրականացման և շահագործման մեջ ներգրավված ընկերությունների ներկայացուցիչներ։