Փորձագետները մտահոգված են Իրանին հասցված հարվածների բնապահպանական հետևանքներով. Bloomberg

Փորձագետները մտահոգված են ԱՄՆ-ի և Իսրայելի կողմից Իրանի դեմ իրականացված հարվածների երկարաժամկետ բնապահպանական հետևանքներով՝ վախենալով, որ հրթիռներից և ռումբերից առաջացած թունավոր նյութերը կարող են աղտոտել Թեհրանի ագլոմերացիան և տասնամյակներով մնալ շրջակա միջավայրում, հայտնում է Bloomberg գործակալությունը։

Վկայակոչելով բրիտանական CEOBS ոչ առևտրային կազմակերպության տվյալները՝ Bloomberg-ը հայտնում է, որ Մերձավոր Արևելքում ներկայիս հակամարտության հետևանքով գրանցվել է ավելի քան 300 միջադեպ, որոնք կապված են շրջակա միջավայրի համար ռիսկի հետ, մասնավորապես՝ մարտի 8-ին Իրանի նավթային ենթակառուցվածքում բռնկված հրդեհը (երկինք են բարձրացել սև ծխի սյուներ, որոնք խառնվել են անձրևային ամպերի հետ և թափվել թունավոր նյութերի տեսքով):

Գործակալությունը նշում է, որ հրթիռների և ռումբերի պայթյունի ժամանակ տեղի է ունենում դրանցում պարունակվող ծանր մետաղների և այլ թունավոր նյութերի արտանետում: Նրանք հաճախ տասնամյակներ շարունակ մնում են օդում, հողում և ջրի մեջ՝ վտանգ ներկայացնելով առողջության համար, և դրանք վերացնելը թանկ է ու դժվար:

Բացի այդ, ինչպես նկատում է Bloomberg-ը, Թեհրանը գտնվում է Էլբուրս լեռան ստորոտում, որը թույլ չի տալիս օդն ազատ շրջանառել, իսկ վնասակար նյութերը՝ լքել այդ շրջանը:

Bloomberg-ը հիշեցնում է, որ 35 տարի առաջ քաղաքում նման բան արդեն պատահել էր. այն ժամանակ դա պայմանավորված էր Քուվեյթի հարյուրավոր նավթահանքերում բռնկված հրդեհներով: Այդ ժամանակ Թեհրանի վրա իջել են մրի, ածխաջրածինների և ծծմբի երկօքսիդի ամպեր: