Ռուսաստանը հրաժարվել է Իրանին վաճառել Ս-400 համակարգեր. Bloomberg

Ռուսաստանը հրաժարվել է Իրանին վաճառել  Ս-400 համակարգեր: Այդ մասին գրում է Bloomberg-ը` երկու իրազեկված աղբյուրների հղումով:

Նշվում է, որ ՌԴ-ն մերժել է Իրանի խնդրանքը, քանի մտավախություններ ունի, որ այդ վաճառքն էլ ավելի կսրի իրավիճակը Մերձավոր Արևելքում:

Իրանի ԱԳ նախարար Մոհամադ Ջավադ Զարիֆը Մոսկվա էր այցելել մայիսի 7-ին: Ռուսաստանի ԱԳՆ-ն չի պատասխանել մեկնաբանություններ տալու` գործակալության խնդրանքին, իսկ իրանցի պաշտոնյաները դեռ չեն ստացել Bloomberg-ի հայցը, քանզի Իրանում հանգստյան օրերը սկսվում են ուրբաթ օրվանից:

«Եթե Ռուսաստանը մերժել է Իրանին նման պահանջում, նշանակում է, որ Ռուսաստանը ցանկանում է պահպանել Սաուդյան Արաբիայի և Իսրայելի հետ հարաբերությունները: Եթե Ռուսաստանը մատակարարի Իրանին Ս-400-ներ, դա անմիջականորեն ուղղված կլինի Սաուդյան Արաբիայի և Իսրայելի դեմ, այսպիսով` դա կլինի Ռուսաստանի սեփական ազգային շահերին դեմ քայլ»,- ասել է Մոսկվայի Ռազմավարական և տեխնոլոգիական վերլուծությունների կենտրոնի ղեկավար Ռուսլան Պուխովը:

Ս-400-ները հակաօդային պաշտպանության համակարգեր են և  նրանց հրթիռները կարող են խոցել մինչև 400 կմ հեռավորությամբ թիրախներ: