Հովվական ծառայության ծանրաբեռնվածության պատճառով ավագ քահանա Մալյանը ազատվել է իր պարտականություններից

Արարատյան Հայրապետական թեմից փոխանցում են, որ Արարատյան Հայրապետական թեմի Կոնդի Սուրբ Հովհաննես եկեղեցու հոգևոր հովիվ Տեր Պետրոս ավագ քահանա Մալյանը «հովվական ծառայության ծանրաբեռնվածության պատճառով՝ իր դիմումի համաձայն, ս.թ. հունվարի 19-ից ազատվել է Արարատյան Հայրապետական թեմի երիտասարդաց միությունների համակարգողի պարտականություններից»:

«Արարատյան Հայրապետական թեմի առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանը շնորհակալագիր հանձնեց Տեր Պետրոս ավագ քահանա Մալյանին, որում մասնավորապես ասվում է.

«Սույն շնորհակալագրով բերում ենք մեր օրհնությունը և գնահատանքը Արարատյան Հայրապետական թեմի Կոնդի Սուրբ Հովհաննես եկեղեցու հոգևոր հովիվ ՏԵՐ ՊԵՏՐՈՍ ԱՎԱԳ ՔԱՀԱՆԱ ՄԱԼՅԱՆԻՆ՝ որպես Հայ Եկեղեցու Արարատյան թեմի անդաստանում իր առաքելությունն իրականացնող հավատարիմ և նվիրյալ հոգևորականի»։

Նավասարդ սրբազանը նշեց, որ Տեր Պետրոսի շնորհիվ թեմում եկեղեցասեր երիտասարդների մասնակցությամբ կյանքի կոչվեցին ազգային-եկեղեցական տոներին նվիրված բազում միջոցառումներ, «Սիրո, Հավատքի և Հավատարմության ուխտերթ»-ը՝ դեպի Մայր Աթոռ Սուրբ Էջմիածին (20 հոկտեմբեր, 2013 թ.), և Սուրբ Հարության տոնին նվիրված ամենամյա «Կանթեղներով երթը» դեպի Հանրապետության հրապարակ:

Նավասարդ Սրբազանը նաև հոգեշահ մաղթանքներով ու օրհնություններով քաջառողջություն և արևշատ օրեր ցանկացավ Տեր Պետրոսին և իր ընտանիքին»,- ասվում է թեմի տարածած հայտարարության մեջ:

Հիշեցնենք՝ ԱՀԹ Երիտասարդաց միություններն ընդամենը երկու շաբաթ առաջ իրենց լիակատար աջակցությունն ու որդիական խոնարհությունն էին հայտնել  հայտնում Մայր Աթոռին և Ամենայն Հայոց Կաթողիկոս Ն.Ս․Օ.Տ․Տ. Գարեգին Երկրորդ Հայրապետին։

«Ակնհայտ է, որ այսօր Հայոց Սուրբ Եկեղեցին գտնվում է դրսից ղեկավարվող տարբեր ուժերի, խմբակների հարձակման տակ: Ինչպես միշտ, այս փորձության ժամերին էլ, որպես հավատարիմ ծառա, ամուր կանգնած ենք մեր Մայր Եկեղեցում։ Շարունակելու ենք աղոթել և գործել մեր Սուրբ Եկեղեցու միաբանության ու անսասանության համար:

Դատապարտում ենք իշխանական ռեսուրսներ, լծակներ ունեցող մարդկանց ներգրավվածությունը այս արշավին, ինչի պատճառով ընկնում է պետության վարկանիշը»,- մասնավորապես նշվում էր նրանց հայտարարության մեջ: