Եղեռնի հուշարձանի շինարարական աշխատանքները ժամանակավորապես կդադարեցվեն. հայտարարություն

Եղեռնի հուշարձանի շինարարական աշխատանքները ժամանակավորապես կդադարեցվեն։ Այս մասին հայտարարել է Հայաստանի ճարտարապետների պալատը։

«Որոշվել է շինարարական աշխատանքները ժամանակավորապես դադարեցնել՝ շինհրապարակի պատշաճ կահավորման և աշխատանքների անվտանգության ապահովման նպատակով, ինչպես նաև շարունակել վերականգնման գործընթացը միայն արդեն իսկ մասնակի քանդված երեք մույթերի հատվածում՝ զուգահեռաբար շարունակելով մասնագիտական քննարկումները հուշարձանի ամբողջական վերականգնման ինժեներական լուծումների և մեթոդաբանության վերաբերյա»,– ասված է հայտարարության մեջ։

Սահմանվել է նաև շինաշխատանքների վարման մշտադիտարկում՝ ԿԳՄՍ նախարարի, պալատի նախագահի և նախագծի հեղինակային խմբի ներկայացուցչի մասնակցությամբ։

Այս որոշումը կայացվել է հուշարձանի տարածքում Հայաստանի ճարտարապետների պալատի խորհրդի անդամների իրականացրած շրջայցից և նախագծի հեղինակային խմբի հետ հանդիպումից հետո։ Պալատի դիմումի հիման վրա հրավիրվել է ԿԳՄՍ նախարարության գիտամեթոդական խորհրդի արտահերթ ընդլայնված նիստ, որին մասնակցել են պալատի խորհրդի հինգ անդամներ, այդ թվում՝ ճարտարապետ Անահիտ Թարխանյանը` Եղեռնի հուշահամալիրի հեղինակ Արթուր Թարխանյանի դուստրը (նա ավելի վաղ մտահոգություն էր հայտնել Եղեռնի հուշարձանի շինաշխատանքների առնչությամբ)։

Հիշեցնենք` Հայոց ցեղասպանության հուշահամալիրում հիմնանորոգման աշխատանքները մեկնարկել են 2024թ–ի հոկտեմբերի 8–ին։ Հիմնանորոգման աշխատանքների համար հատկացումներն արվելու են ՀՀ պետական բյուջեից՝ շուրջ 743 մլն ՀՀ դրամ։