Յունիբանկը ժամկետից շուտ ավարտեց արտոնյալ բաժնետոմսերի տեղաբաշխումը

Յունիբանկը սահմանված ժամկետից շուտ ամբողջությամբ տեղաբաշխեց 1.5 միլիարդ ՀՀ դրամ ծավալով արտոնյալ բաժնետոմսերը: Ցուցակման գործընթացի ավարտից հետո բաժնետոմսերը կշրջանառվեն Հայաստանի ֆոնդային բորսայի (AMX) առևտրային հարթակում։

Գ դասի փոխարկելի արտոնյալ բաժնետոմսերը թողարկվել են տարեկան 12% հաստատագրված շահութաբաժնով: Մեկ բաժնետոմսի անվանական արժեքը սահմանվել էր 390 դրամ, նվազագույն ներդրման չափը՝ 1 միլիոն դրամ։ Բաժնետոմսերի այդ տեղաբաշխման՝ հանրությանը պատկանող բաժնեմասը (free float) կազմեց ավելի քան 85%։

Յունիբանկն իրականացրել է բաժնետոմսերի 8 և պարտատոմսերի 26 թողարկում, որոնք հաջողությամբ տեղաբաշխվել են, ինչը վկայում է՝ ինչպես անհատ, այնպես էլ՝ կորպորատիվ ներդրողների կողմից բանկի հանդեպ բարձր վստահության և ներդրումային գործիքների նկատմամբ աճող հետաքրքրության մասին։ Տեղաբաշխման արդյունքում Յունիբանկի բաժնետերերի թիվը հասավ 400-ի։