Սամվել Կարապետյանի փաստաբանները պահանջում են կարգապահական վարույթ հարուցել 2 դատավորի դեմ

Գործարար, բարերար Սամվել Կարապետյանի փաստաբանական թիմը կարգապահական վարույթ հարուցելու հաղորդումներ է ներկայացրել դատավորներ Արտակ Կարապետյանի և Արմեն Դանիելյանի դեմ։

Սամվել Կարապետյանի փաստաբանական թիմի անդամ Արամ Վարդևանյանը հայտարարությամբ է հանդես եկել։

«Հունիսի 18-ից Սամվել Կարապետյանը` կալանավորված է: Կալանավորված է հունիսի 17-ին հրապարակավ ներկայացված հաշվեհարդարի խոստման, Գլխավոր դատախազի հաղորդման և Դատավոր Արտակ Կարապետյանի ակնհայտ ապօրինի որոշմամբ: Պատճառը պարզապես մեր Հայ Առաքելական Սուրբ Եկեղեցու կողքին լինելն է, պաշտպանելն է և քաղաքական հետապնդումը:

Հիշեցման կարգով իրավունքի հետ նվազագույն աղերս չունեցող կալանքի որոշման դեմ արդյունավետ վերաքննության իրավունքից պաշտպանության կողմը զրկվել էր դատավոր Արմեն Դանիելյանի միջոցով: Այս ամենը կատարվում էր նաև հենց այսօրվա ՀԷՑ-ի դեմ գործողությունների ապահովման նպատակով:

Գործընկերներներիս հետ միասին ներկայացրել ենք նաև վճռաբեկ բողոքներ: Միաժամանակ առաջնային ցանկանում եմ ընդգծել, որ կարգապահական վարույթ հարուցելու հաղորդումներ են ներկայացվել դատավորներ Կարապետյանի և Դանիելյանի դեմ: Նշյալ Դատավորները իրենց կայացրած դատական ակտերով ակնհայտորեն հանգեցրել են մարդու իրավունքների հիմնարար խախտումների և դատական իշխանության հեղինակազրկման»,- նշել է Վարդևանյանը։