Չալո՞ն է տրամադրել ԱՄՆ-ին ՀՀ քաղաքացիների քրեական հաշվառումների տվյալները

ԱՄՆ դեսպանատունը մարտի 23-ին հայտարարություն է տարածել, ըստ որի՝ «քրեական հանցանքի համար դատվածությունը կարող է ԱՄՆ մուտք գործելու հնարավորությունից ձեզ մեկընդմիշտ զրկել: Նույնիսկ ոչ ծանր հանցանքը կարող է վիզայի մերժման պատճառ դառնալ»։

Հայտարարության մեջ կա նաև չափազանց ուշագրավ մի դրվագ. «Հյուպատոսական պաշտոնյաներին հասանելի են քրեական հաշվառումների տվյալները և նրանք դիտարկում են նախկին խախտումների ու ձերբակալությունների մասին տվյալները»,- ասվում է հայտարարության մեջ ու ավելացվում, որ «դիմումի մեջ և հարցազրույցի ընթացքում հայտնեք բացառապես ճշմարտությունը. սուտ ասելու պարագայում ձեր հանդեպ կսահմանվի մուտքի արգելք»։

Հայաստանի քաղաքացիներին հետաքրքիր է՝ ո՞վ է ՀՀ քաղաքացիների քրեական հաշվառումների տվյալները փոխանցել ԱՄՆ-ին և դրել այդ երկրի դեսպանատան տրամադրության տակ: Իբրև անկախ պետության քաղաքացիներ՝ մարդկանց հետաքրքրում է նաև, թե ՀՀ հատուկ ծառայություններին հասանելի՞ են ԱՄՆ քաղաքացիների՝ քրեական հաշվառումների մասին տվյալները:

Վերոնշյալ հարցերը ՀՀ վարչապետի աշխատակազմից  մեզ գրավոր հորդորեցին դիմել ՀՀ դատախազություն: ՀՀ գլխավոր դատախազությունն էլ գրավոր պատասխանով «իր վրայից գցել է»՝ կարճ հայտնելով, թե ՀՀ դատախազության կողմից նման տեղեկություններ չեն փոխանցվել:

Փաստորեն, ըստ ՀՀ կառավարության՝ նման տվյալներ կարող էր տալ միայն ՀՀ դատախազությունը, այլապես հենց այնպես մեզ չէին գրավոր կերպով ուղղորդի  այնտեղ: Դատախազությունն էլ ասում է՝ ես տեղյակ չեմ: Այդ դեպքում Փաշինյանի իշխանությանը չի՞ հետաքրքրում, թե ով է ԱՄՆ Հյուպատոսական պաշտոնյաներին տրամադրել ՀՀ քաղաքացիների քրեական հաշվառումների տվյալները, որոնք էլ նա կարող է համարել ԱՄՆ մուտքի վիզայի մերժման հիմք:

Միգուցե Չալո՞ն է տրամադրել: Եվս մի հռետորական հարց՝ Փաշինյանի իշխանությունը, բացի ընդդիմադիրների վրա խմբակային հարձակման վարժանքներից, որևէ այլ բանի տիրապետու՞մ է:     

Վ. Սարգսյան