Պետական կառավարման համակարգի հերթական փնթիությունը

ԿԳՄՍ նախարար Ժաննա Անդրեասյանը երեկ՝ փետրվարի 20-ի ուշ երեկոյան, կեսգիշերից 41 րոպե առաջ ֆեյսբուքի անձնական էջում հայտարարություն տարածեց՝ դիմելով ծնողներին, ուսուցիչներին ու աշակերտներին. «Հաշվի առնելով եղանակային անբարենպաստ պայմանները՝ տեղեկացնում ենք, որ վաղը՝ փետրվարի 21-ին, հանրապետության դպրոցներում դասերը կհետաձգվեն: Դասերը կլրացվեն կիսամյակի ընթացքում»:

Նախարարի անձնական էջի այս գրառումը 7 րոպե անց հայտնվեց նախարարության ֆեյսբուքյան էջում: Մինչդեռ՝ այսօր, փետրվարի 21-ին, ժամը 14:00-ի դրությամբ, Yerkir.am-ը նկատեց, որ նախարարության պաշտոնական կայքում որևէ հայտարարություն չկա 21.02.2025 թ. դասապրոցեսը կասեցնելու մասին: 

Ավելին, նախարարության կայքում մինչ ժամը 14:00-ն չկա որևէ իրավական ակտ՝ նախարարի հրաման, որի հենքի վրա այսօր հանրապետության հանրակրթական դպրոցներում չի իրականացվել դասապրոցես:  

Պարզ չի նաև, թե նախարարը նման որոշում կայացրել և անձնական էջով տարածել է ՆԳՆ-ի (փրկարար ծառայության) կողմից ստացված գրավոր առաջարկի հիման վրա՞, թե՞ սեփական նախաձեռնությամբ կամ քմահաճույքով:

Փաստորեն, 2018 թ. ֆեյսբուքով իշխանության եկած այս խմբակը մինչ այժմ երկիրը կառավարում է ֆեյսբուքով և վոթսափով, և Ժաննա Անդրեասյանը ևս շարունակելում է այդ տխրահռչակ ավանդույթը՝ հայտարարություններ տարածելով ու դասապրոցես կասեցնելով առանց որևէ իրավական ակտի:

Ի լրումն՝ հայտնենք, որ, օրինակ, Երևանի քաղաքապետարանի պաշտոնական կայքում ևս որևէ պաշտոնական լուր, հրամանագիր չկա: Թե ինչի հիման վրա է մայրաքաղաքի իշխանությունը կասեցրել իր ենթակայության տակ գտնվող հիմնական դպրոցների դասապրոցեսը, հայտնի չէ: