Ռուսաստանը կարող է միջուկային զենք կիրառել Բելառուսի դեմ ագրեսիայի դեպքում

Ռուսական միջուկային զենքը կարող է օգտագործվել Ռուսաստանի կամ Բելառուսի դեմ ագրեսիայի դեպքում, եթե վտանգ կա երկրների ինքնիշխանությանը և տարածքային ամբողջականությանը։ Այս մասին ասված է Բելառուսի հետ Միութենական պետության կազմում անվտանգության երաշխիքների մասին համաձայնագրում, որը ՌԴ նախագահ Վլադիմիր Պուտինը ներկայացրել է Պետդումա՝ վավերացման, գրում է ТАСС-ը։ 

Պայմանագրի համաձայն՝ Ռուսաստանի միջուկային զենքը կարող է օգտագործվել ի պատասխան Ռուսաստանի կամ Բելառուսի դեմ միջուկային զենքի կամ զանգվածային ոչնչացման զենքի այլ տեսակների կիրառման, ինչպես նաև «սովորական զենք օգտագործող կողմերից որևէ մեկի դեմ ագրեսիայի դեպքում, որը կրիտիկական սպառնալիք է ստեղծում նրա ինքնիշխանության կամ տարածքային ամբողջականության համար»:

Պայմանագրի կողմերը Ռուսաստանի Դաշնության միջուկային զենքը համարում են «կարևոր գործոն միջուկային ռազմական բախումների և սովորական զենքի օգտագործմամբ ռազմական հակամարտությունների առաջացումը կանխելու համար, ինչպես նաև զսպման միջոց, որի կիրառումը ծայրահեղ և հարկադիր միջոց է»:

Բացի այդ, կողմերը Միութենական պետության մասնակցի վրա զինված հարձակումը դիտարկում են որպես ագրեսիայի ակտ ամբողջ Միութենական պետության դեմ և կձեռնարկեն համապատասխան պատասխան միջոցներ՝ օգտագործելով իրենց տրամադրության տակ եղած բոլոր ուժերն ու միջոցները: Մասնավորապես, երկրներից մեկի դեմ ագրեսիայի դեպքում Միութենական պետության երկրորդ երկիրը, նախագահների համաձայնությամբ, պաշտոնական դիմումից հետո անմիջապես տրամադրում է անհրաժեշտ ռազմական, ռազմատեխնիկական և այլ օգնություն: