Ռուսաստանը կարող է քիմիական զենք կիրառել Ուկրաինայում. Սպիտակ տուն

Ռուսաստանը կարող է քիմիական զենք կիրառել Ուկրաինայում կամ ստեղծել «կեղծ դրոշի» գործողություն՝ դրա համար մեղադրելով Ուկրաինային. Twitter-ի իր էջում գրել է Սպիտակ տան մամուլի քարտուղար Ջեն Փսակին։

Վաշինգտոնի ներկայացուցիչը իրականությանը համապատասխան չի համարում Ռուսաստանի այն հայտարարությունները, թե իբր ԱՄՆ-ն Ուկրաինայում քիմիական զենք է մշակում։

«Այժմ, երբ Ռուսաստանը ներկայացրել է այս կեղծ պնդումները, և Չինաստանը, կարծես, աջակցել է այդ քարոզչությանը, բոլորս պետք է հետևենք Ռուսաստանին, որը Ուկրաինայում քիմիական կամ կենսաբանական զենք կարող է կիրառել կամ «կեղծ դրոշի» գործողություն իրականացնել՝ կիրառելով դրանք»,- գրել է նա։

Հիշեցնենք, որ ավելի վաղ The Guardian-ը, վկայակոչելով բրիտանական կառավարությունում իր աղբյուրները, գրել էր, որ Լոնդոնը մտավախություն ունի, թե Ռուսաստանը կարող է պատրվակ սարքել Ուկրաինայի հետ պատերազմում քիմիական զենք կիրառելու համար, քանի որ Կիևն արագ գրավելու ծրագիրը ձախողվել է:

Ռուսաստանն ավելի վաղ հայտարարել էր, որ Արևմուտքը հնարավոր է քիմիական զենքի սադրանքներ իրականացնի Ուկրաինայում` մեղքը բարդելով Մոսկվայի վրա: