Այսուհետ չի հանդուրժվելու Ադրբեջանի ու Թուրքիայի նկատմամբ սուր խոսքը. ԱԱԾ նախկին տնօրեն

ԱԱԾ տնօրենի նախկին ժամանակավոր պաշտոնակատար Միքայել Համբարձումյանի գնահատմամբ՝ Հանրապետության հրապարակում ադրբեջաներենով հայերին վիրավորող երգը երգող օտարերկրացիների մասնակցությամբ տեսանյութը հրապարակելու համար ձերբակալված Ղարիբ Բաբայանի հետ կատարվածում ՀՀ ԱԱԾ-ի դերակատարությունը առերևույթ է։

«Ոչ նախաձեռնողական ու խորքային (համենայնդեպս, այդպես եմ ուզում մտածել), սա պետական քաղաքականության հիմնովին  փոփոխության արդյունք է:

Հայաստանի Հանրապետության դատարանը իր որոշմամբ փաստեց, որ կա հանցագործության դեպք, Ղարիբ Բաբայանի նկատմամբ ծագել է հիմնավոր կասկած, պարզապես կալանք չի կիրառվում՝ հիմքերով պայմանավորված:

Սրանով բոլորին հստակ ուղերձ իջեցվեց, որ այսուհետ չի հանդուրժվելու Ադրբեջանի ու Թուրքիայի նկատմամբ սուր խոսքը, քննադատությունը, նաև մեսիջ էր նշված երկրներին, որ այս իմաստով մենք նոր իրավիճակ ենք ձևավորում և Հայաստանը բաց ու անվտանգ է թուրքական աշխարհի համար, շարունակենք համագործակցել...»,- գրել է Համբարձումյանը, ով այժմ փաստաբանական գործունեությամբ է զբաղվում։