Ահազանգ. Թալինի ղեկավարությունը Աշնակի մշակույթի տան պատից ջնջել է Նժդեհի ու Ավոյի դիմապատկերները

Թալին խոշորացված համայնքի Աշնակ գյուղի մշակույթի տան պատին դրսի կողմից նկարված են եղել Նժդեհի և Մոնթեի նկարները։

Yerkir.am-ի տեղեկություններով` այս մասին իմանալով` Փաշինյանի իշխանության վերին օղակներից հրահանգ է տրվել, որ այդ դիմապատկերբերը պետք է ջնջվեն պատից։

Yerkir.am-ին աշնակցիները պատմեցին, որ Թալին խոշորացված համայնքի ղեկավար Տավրոս Սափեյանը զանգահարել է Աշնակ գյուղի վարչական ղեյավարին և ասել` ջնջեք այդ նկարները։

Աշնակ գյուղի վարչական ղեկավարը, ըստ գյուղացիների, ընդդիմանում է և չի ջնջում նկարները, ինչի պատճառով վերջինիս ազատում են աշխատանքից։

Նոր նշանակված ղեկավարը մի օրվա մեջ իրագործում է իշխանության հրահանգն ու համայնքային իշխանության ներկայացուցիչների հետ միասին պատից քերում Նժդեհի ու Մոնթեի նկարները։

Ներկայումս պատը ներկված է, և հենց այդ «նորոգման» պատճառաբանությամբ էլ քերել են նկարները։

Տոնական, ոչ աշխատանքային օրվա պատճառով Yerkir.am-ին չհաջողվեց կապ հաստատել Թալինի համայնքապետարանի հետ, մեր զանգերին չպատասխանեցին նաև միջադեպի մասնակից պաշտոնյաները։

Yerkir.am-ը առաջիկա օրերին կներկայացնի Փաշինյանի իշխանության այս հերթական թրքահաճո քայլի մանրամասները։