Մշակույթի նախարարը Նժդեհի արձանի վերաբերյալ կարծիք չունի

Երևանում արձաններ տեղադրելու հարցը գտնվում է քաղաքապետարանի իրավասության ներքո, մշակույթի նախարարությունը չի լուծում այդ հարցերը. Yerkir.am-ի հետ զրույցում ասաց մշակույթի նախարար Հասմիկ Պողոսյանը` խոսելով կառավարության երրորդ մասնաշենքի հարևանությամբ Նժդեհի արձանի տեղադրման մասին:

«Մենք բովանդակային ընդհանուր կողմով ասում ենք` նպատակահարմար գտնում ենք արձանը դնել, թե` նպատակահարմար չենք գտնում, բայց տեղադրման տեղը որոշում է քաղաքապետարանը»,- ասաց նախարարը:

Հարցին` արդյոք՞ նպատակահարմար չէր արձանը տեղադրել հենց Նժդեհի անվան հրապարակում, Հասմիկ Պողոսյանը պատասխանեց. «Ես չեմ կարող քաղաքապետարանի փոխարեն այսօր ասել, թե ինչո՞ւ են նրանք այդպես նպատակահարմար գտել»:

Արձանի տեղադրման վայրի վերաբերյալ էլ նախարարը հրաժարվեց կարծիք հայտնել: «Ես չեմ կարող այդ հարցին պատասխանել, որովհետև ես չեմ ուզում մեկնաբանել այն ոլորտը, որտեղ ես իրավասու չեմ մտնել: Իսկ դուք քաղաքապետարանին հարցրե՞լ եք, թե ինչ պատճառաբանությամբ են նրանք այս կամ այն տեղը որոշում: Մենք ունենք ներկայացուցիչ քաղաքապետարանի ճարտարապետական խորհրդում, որը մեր փոխնախարարն է, և այն, ինչ այնտեղ կուտակվում, խոսում են, դուք ուզում եք, որ մեկ վայրկյանում ձեզ ասե՞մ: Ես չգիտեմ, թե նրանք ինչ պատճառաբանություններ են բերել»,- ասաց նա: