Ռուսաստանը պատրաստ է Հայաստանի հետ Անդրկովկասի հարցով երկխոսության. Գալուզին

Ռուսաստանը հավատարիմ է Հայաստանի հետ պայմանագրերի ողջ շրջանակին և չի հրաժարվում ռազմաքաղաքական ոլորտում իր պարտավորություններից, ասել է փոխարտգործնախարար Միխայիլ Գալուզինը, գրում է РИА Новости-ն։

«Մոսկվան հավատարիմ է եղել և մնում է համաձայնությունների ողջ շրջանակին ինչպես երկկողմ մակարդակով, այնպես էլ եվրասիական տարածքում միավորման շրջանակներում։ Մենք չենք հրաժարվում մեր դաշնակիցների հանդեպ մեր պարտավորություններից, այդ թվում՝ ռազմաքաղաքական ոլորտում»,- ասել է Գալուզինը Ռուսաստան-Հայաստան երկրորդ հասարակական համաժողովում։

Նա հավելել է, որ Ռուսաստանը տարիներ շարունակ ձևավորում է անվտանգության ճարտարապետությունը Հարավային Կովկասում։ Գալուզինը նշել է, որ Ռուսաստանի դերն այս հարցում միշտ պահանջված կլինի՝ հաշվի առնելով տարածաշրջանում և ամբողջ աշխարհում դինամիկ իրավիճակը։

«Մենք պատրաստ ենք այս հրատապ թեմայի շուրջ Երևանի հետ անկեղծ և առարկայական զրույցի»,- ընդգծել է փոխնախարարը։

Հիշեցնենք՝ Աստանայում ընթանում է Հավաքական անվտանգության խորհրդի հերթական նիստը կազմակերպության երկրների ղեկավարների մասնակցությամբ։ Հայաստանը, որը հայտարարել է կազմակերպությանն իր անդամակցության սառեցման մասին, կրկին չի մասնակցում գագաթնաժողովին, սակայն հայտարարել է, որ չի առարկում նախատեսված փաստաթղթերի ընդունմանը: