Ատոմային ռումբի «պայթյուն»՝ «Օսկարում»․ «Օպենհայմերը» 7 մրցանակ նվաճեց

Լոս Անջելեսում կայացել է ամերիկյան կինոակադեմիայի «Օսկար» կինոմրցանակի հանձնման 96-րդ արարողությունը։ Հայտնի են նոր դափնեկիրների անունները 23 անվանակարգերում։

Քրիստոֆեր Նոլանի «Օպենհայմեր» դրաման, որն առաջադրվել էր 13 անվանակարգերում, նվաճել է դրանցից 7-ը, այդ թվում՝ «Լավագույն ֆիլմ», «Լավագույն ռեժիսոր», «լավագույն դերասան», «Լավագույն մոնտաժ», «Երկրորդ պլանի լավագույն դերասան» և «Լավագույն օպերատորական աշխատանք» անվանակարգերում։ Ֆիլմը «ատոմային ռումբի հայր» Ռոբերտ Օպենհայմերի կյանքի և ատոմային ռումբի առաջին փորձարկումների մասին է։

«Լավագույն դերասանուհի» անվանակարգում հաղթել է Էմմա Սթոունը («Խեղճուկրակները» Poor Things) ֆիլմի համար։

«Լավագույն օրիգինալ սցենար» անվանակարգում մրցանակ է շահել «Անկման անատոմիա» (Anatomy of a Fall) ֆիլմը։

«Լավագույն վավերագրական ֆիլմ»  անվանակարգում հաղթել է «20 օր Մարիուպոլում»-ը (20 Days in Mariupol), իսկ «Լավագույն անիմացիոն ֆիլմ» անվանակարգում՝ «Տղան և ձկնկուլը» (Kimitachi wa Dou Ikiru ka) ստեղծագործությունը։