Ինքնակամ կառույցների օրինականացման վերջնաժամկետը ողջամիտ չէ․ Արման Ղազարյան

Կառավարության հետ հարցուպատասխանի ժամանակ «Հայաստան» խմբակցության պատգամավոր Արման Ղազարյանը բարձրացրեց՝ ինքնակամ կառույցների օրինականացման հարցը՝ նշելով․

«ՀՀ կառավարության 2022թ․ հունվարի 5-ի թիվ 13-Ն որոշմամբ կատարվել է փոփոխություն։ Ըստ այդմ, եթե մինչև 2023 թվականի դեկտեմբերի 31-ը ինքնակամ կառույցները չեն հաշվառվել, ապա դրանք այլևս օրինականացման ենթակա չեն։ Այս որոշումը պատշաճ հասանելի չի դարձվել քաղաքացիներին և մյուս կողմից էլ՝ սահմանված վերջնաժամկետը ողջամիտ չէ։ Ինքնին սա ոչ լիարժեք և խնդրահարույց է՝ իրականում առկա խնդրի լուծման տեսանկյունից։

Միայն Մարտունու տարածաշրջանում կան նմանատիպ 3000-ից ավել ինքնակամ շինություններ, որոնց մեծ մասը կառուցվել են տասնյակ տարիներ առաջ։ Մեր հայրենակիցները օբյեկտիվորեն սպասում են հետևյալ հարցերի պատասխաններին․

1․ Ի՞նչ է սպասվում այդ շինությունները փաստացի տնօրինող մեր հայրենակիցներին, որոնց մեծ մասը այդ շինություններով են կարողանում ապահովել իրենց նվազագույն կենսապայմանները։

2․ Այս խնդրի իրական և ողջամիտ լուծումն ապահովելու համարհնարավոր ի՞նչ տարբերակներ եք քննարկում»,-հետաքրքրվեց Արման Ղազարյանը։