Թրամփը վճռորոշ հաղթանակ է տարել Այովա նահանգում

ԱՄՆ նախկին նախագահ Դոնալդ Թրամփը վճռորոշ հաղթանակով մեկնարկեց հանրապետականների նախնական ընտրությունները։ 2016 թվականին նա պարտվել էր Այովա նահանգում, սակայն այս անգամ փայլուն հաղթանակ է գրանցել այնտեղ:

Հարցումները ցույց էին տալիս, որ ամիսներ շարունակ այս նահանգում նախագահի պաշտոնին հավակնող հանրապետականների թեկնածուներից հենց Թրամփն էր առաջատար, բայց այս հաղթանակը ամերիկյան ԶԼՄ-ները ապշեցուցիչ են որակել: Նա հաղթել է Այովա նահանգի գրեթե բոլոր 99 քաղաքներում։ Նախնական հարցումները եւ հանրապետական ​​ընտրողների հետ ավելի վաղ արված հարցազրույցները հուշում էին, որ «Վերադարձնենք ԱՄՆ-ին երբեմնի հզորությունը» շարժումը ամուր հիմքեր ունի այդ նահանգում: Հարցումները նաեւ փաստում են, որ Այովայում ընտրողները անկարեւոր են համարում  ​​Թրամփի իրավական խնդիրները եւ որ ներգաղթը որոշիչ հարցերից է, որն ազդել է նրանց քվեարկության վրա:

ՄԱԿ-ում ԱՄՆ նախկին ​​ներկայացուցիչ Նիկի Հեյլին միայն մեկ քաղաքում կարողացավ հաղթել Թրամփին՝ այն էլ ընդամենը մեկ ձայնի տարբերությամբ։ Իսկ Ֆլորիդայի նահանգապետ Ռոն Դե Սանտիսին, որը նույնպես թեկնածությունն է առաջադրել, հաջողվեց գրավել երկրորդ տեղը հանրապետականների նախնական ընտրություններում՝ առաջ անցնելով Նիկի Հեյլիից։

Այովան նահանգներից առաջինն է, որում հանրապետական ​​ընտրողները ընտրում են Սպիտակ տան իրենց թեկնածուին։

Դոնալդ Թրամփը հանդարտ տոնով խնդրեց աջակիցներին մասնակցել երթի, որպեսզի ջախջախեն Ջո Բայդենին եւ լուծեն աշխարհի խնդիրները։