Իրանի ԱԳ նախարարը հերքել է տեղեկությունները, թե Մեծամորի ատոմակայանն աղտոտում է Արաքսը

Իրանի արտաքին գործերի նախարար Հոսեյն Ամիր Աբդոլլահիանը հերքել է այն պնդումները, թե հարևան Հայաստանի Մեծամորի ատոմակայանը կարող է ռադիոակտիվ նյութերով աղտոտել սահմանային Արաքս գետը, գրում է Tasnim-ը։

Իրանի ԱԳ նախարարը կիրակի օրը Թեհրանում մասնակցել է Իրանի խորհրդարանի Ազգային անվտանգության և արտաքին քաղաքականության հանձնաժողովի նիստին։

Պատասխանելով հյուսիսարևմտյան Արդաբիլ նահանգի երկու սահմանամերձ շրջանները ներկայացնող պատգամավորի հարցին՝ Ամիր Աբդոլլահիանը հերքել է Արաքս գետի ռադիոակտիվ աղտոտման վերաբերյալ մտահոգությունները:

Նա հայտարարել է, որ Իրանի ատոմային էներգիայի կազմակերպության տեխնիկական զեկույցը և ստուգման աշխատանքները հերքել են Հայաստանում Մեծամորի ատոմակայանի շահագործման արդյունքում Արաքս գետի աղտոտման հավանականությունը։

Հիշեցնենք, որ ադրբեջանական ԶԼՄ-ները գրել էին՝ իբր Մեծամորի ատոմակայանը ամեն օր 12000-16000 խմ ռադիոակտիվ թափոն է լցնում Արաքս։