44-օրյայի մասին պատմող «1489» ֆիլմը հաղթել է IDFA Փառատոնում

Կինոռեժիսոր Շողակաթ Վարդանյանը 44-օրյա պատերազմի օրերին ծնողների հետ անհայտ կորած եղբորն էր փնտրում՝ Սողոմոնին: Տղան անհետ կորել էր 2020 թվականի հոկտեմբերին։ Երիտասարդ ռեժիսորը, օգտագործելով իր հեռախոսի տեսախցիկը, նկարահանել է եղբոր որոնման ողջ գործընթացը եւ փաստագրել այն փորձառությունները, որոնց միջով անցել են ինքն ու ընտանիքը։ 

Վավերագրական կինոյի աշխարհի ամենահեղինակավոր կինոփառատոնը՝ Ամստերդամի միջազգային փաստավավերագրական փառատոնը (IDFA) «Լավագույն ֆիլմ» անվանակարգում հաղթող է ճանաչել Շողակաթ Վարդանյանի, 44-օրյա պատերազմի անձնական ողբերգությունից ծնված «1489» դեբյուտային ֆիլմը եւ շնորհել գլխավոր մրցանակը: Ֆիլմն արժանացել է նաեւ «FIPRESCI» մրցանակին, ինչն աննախադեպ հաջողություն է հայ կինոյի պատմության մեջ։

Փառատոնի ժյուրին ֆիլմին տրված գնահատականը ձեւակերպել է այս կերպ. «Ֆիլմ, որը հանդես է գալիս որպես թափանցող լույս, որը տեսանելի է դարձնում հսկայական վշտի թաքնված ներքին լանդշաֆտը եւ ստեղծում է շոշափելի ներկայություն անտանելի բացակայությունից: Կինոն որպես գոյատևման գործիք՝ թույլ է տալիս բոլորիս տեսնել այն, ինչ մենք նախընտրում ենք չտեսնել: Եվ, ի վերջո, այն կինոյի անմոռանալի օրինակ է՝ որպես սիրո ակտ»: