Ռուսական ռազմակայանը Գյումրիում կմնա մինչեւ 2044 թվականը

Հայաստանի խորհրդարանը 80 կողմ ձայնով վավերացրել է երկրի տարածքում ռուսական ռազմակայանի տեղակայման ժամկետների երկարաձգման մասին արձանագրությունը։ Այդպիսով` Գյումրիում տեղակայված ռազմակայանը մեր երկրում կմնա մինչեւ 2044 թվականը:

Ըստ ՀՀ պաշտպանության փոխնախարար Արա Նազարյանի` արձանագրությունում նշվում է, որ Ռուսաստանն աջակցելու է Հայաստանի անվտանգության ապահովմանը: Սա ավելի է կոնկրետացնում գործող այն նորմը, որ Ռուսաստանը պաշտպանում է նախկին Խորհրդային Հայաստանի սահմանների անվտանգությունը։ Շրջանառությունից հանվում է այն միտքը, թե ռուսական ռազմակայանը կոչված է պաշտպանելու Հայաստանի` միայն Իրանի եւ Թուրքիայի հետ սահմանները։

Փոխնախարարը  նաեւ ասաց, որ, ըստ փաստաթղթի, Ռուսաստանը Հայաստանին  ապահովելու է մարտական ժամանակակից տեխնիկայով եւ զինամթերքով։