Արցախի պետական համալսարանի պահպանման մասին. Մենուա Սողոմոնյան

Ուրախ եմ, որ Արցախի պետական համալսարանի պահպանման հանրային պահանջ է ձևավորվում։

ԱրՊՀ-ն շատ սպեցիֆիկ կրթական միջավայր է, որի գործառույթների շարքում առանձնակի կարևորելի է Արցախի պատմության, բանահյուսության, ազգագրության և հարակից ուղղությունների պահպանումն ու զարգացումը։ Դա կարող է լինել ընդդեմ ադրբեջանական ցեղասպանության պաշտպանական նվազագույն քայլերը։

ԱրՊՀ-ի պահպանումը շատ կարևոր է Արցախյան համայնքը պահպանելու, տարրալուծումը թույլ չտալու տեսանկյունից։

Սոցիալական կարևոր հարցերից մեկը դասախոսների աշխատանքն ու մասնագիտական գործունեության շարունակումն է։ Անթույլատրելի է մասնագիտական այս ներուժի փոշիացումը թույլ տալը։ Արցախի պրոֆեսորադասախոսական կազմի ամբողջության պահպանումը և նրա առջև յուրահատուկ խնդիրներ դնելը առաջնահերթություն է։

ԱրՊՀ-ը ՀՀ համապատասխան կառույցների կողմից հավատարմագրված բուհ է։ Նրա ինստիտուցիոնալ հավատարմագրման փորձագիտական խումբը ղեկավարելու պատիվն եմ ունեցել 2021-ի մարտին։ Փորձագիտական այցը ցույց է տվել, որ ԱրՊՀ-ն առավել, քան կայացած հաստատություն է։ Նրա հավատարմագրման ժամկետը մինչև 2027 թիվն է, այսինքն առնվազն այդքան ժամկետով կա պարտավորություն բուհը պահպանելու ։

Պատրաստ եմ իմ ուժերի ներածին չափով ծառայելու ԱրՊՀ-ի պահպանմանը և զարգացմանը։ Կարծում եմ՝ կարելի է այս պահանջը առաջ տանելու համար նախաձեռնել քննարկում։

Մենուա Սողոմոնյան

ԵՊՀ դոցենտ