Սեպտեմբերի 21-ին նախատեսվում է ՄԱԿ-ի ԱԽ նիստ՝ նվիրված Արցախում տիրող իրավիճակին

Սեպտեմբերի 21-ին նախատեսվում է ՄԱԿ-ի Անվտանգության խորհրդի նիստ՝ նվիրված Լեռնային Ղարաբաղում տիրող իրավիճակին։ Այս հայտնում է ՏԱՍՍ-ը՝ վկայակոչելով համաշխարհային կազմակերպության աղբյուրը։

«Հանդիպումը պետք է կայանա հինգշաբթի օրը, Նյու Յորքի ժամանակով կեսօրին»։

Այս օրերին ՄԱԿ-ում անցկացվում է ՄԱԿ-ի Գլխավոր ասամբլեայի բարձր մակարդակի շաբաթը, ուստի հանդիպմանը կարող են մասնակցել մի քանի պատվիրակությունների ղեկավարներ։

Ադրբեջանն այսօր լայնամասշտաբ հարձակում է սկսել Արցախի դեմ։ Արցախի ՊՆ–ի հաղորդագրության համաձայն` ժամը 13։00–ի սահմաններում ադրբեջանական զինուժը շփման գծի ողջ երկայնքով խախտել է հրադադարը` հասցնելով հրթիռահրետանային հարվածներ։

Ադրբեջանի կողմից իրականացված լայնածավալ ահաբեկչական հարձակման հետևանքով կա 25 զոհ (այդ թվում՝ 2 խաղաղ բնակիչ), 140 վիրավոր։