ՀՅԴ Լիբանանի Հայ Դատի Մարմինը Ապահովութեան Խորհուրդի Նիստին Վերաբերեալ Նամակներ Յղեց Դեսպաններու

ՀՅԴ Լիբանանի Հայ դատի մարմինը երէկ Լիբանանի մէջ Միացեալ Նահանգներու, Ռուսիոյ, Ֆրանսայի, Բրիտանիոյ, Չինաստանի, Եւրոպական Միութեան, Զուիցերիոյ, Պրազիլի եւ Սպանիոյ դեսպաններուն յղեց 16 օգոստոսին ՄԱԿ-ի Ապահովութեան խորհուրդի` Հայաստանի Հանրապետութեան դիմումով Ազրպէյճանի կողմէ Բերձորի շրջափակման եւ ատոր իբրեւ հետեւանք Արցախի մէջ մարդասիրական կացութեան վատթարացման հարցով հրատապ նիստի առիթով նամակներ, որոնց մէջ ակնկալութիւն յայտնեց, որ ՄԱԿ-ի Ապահովութեան խորհուրդը տէր կը կանգնի եւ կ՛ապահովէ գործադրութիւնը ՄԱԿ-ի կառոյցներէն Արդարադատութեան միջազգային դատարանի 22 փետրուար 2023-ի միաձայնութեամբ որդեգրած որոշումին, որ Պաքուին կը հրամայէ ապահովել Բերձորի միջանցքով ազատ ու անվտանգ երթեւեկը:

«Ուստի կը յուսանք, որ ՄԱԿ-ի Ապահովութեան խորհուրդի վերոնշեալ նիստը պիտի չվերածուի դեկտեմբեր 2022-էն ի վեր մեր լսած իրերայաջորդ յայտարարութիւնները կրկնելու մէկ այլ առիթի, ինչպէս նաեւ հայ ժողովուրդին նկատմամբ կատարուած իսկական եւ շօշափելի արդիւնքէ զուրկ յաւելեալ անիմաստ ժեստի:

«Հարցը այլեւս դադրած է մարդասիրական ճգնաժամի կանխարգիլման մասին ըլլալէ: Անիկա արդէն վերածուած է գոյութենական ճգնաժամի, որ դեկտեմբեր 2022-էն ի վեր առօրեայ դրութեամբ կը խորանայ: Հարցը ցեղասպանութեան կանխարգիլման մասին է, ինչպէս մարդկային իրաւանց կազմակերպութիւններ, գործիչներ եւ Միջազգային քրէական դատարանի նախկին դատախազ Լուիս Մորենօ Օքամփօ յստակօրէն մատնանշեցին: Այս առումով, մենք ապշած ենք լսելով Ազրպէյճանի եւ Արցախի Հանրապետութեան ներկայացուցիչներու միջեւ երկխօսութեան կոչերը, որովհետեւ ցեղասպանութիւնը կարելի չէ կանխարգիլել յանցագործին եւ անոր զոհին միջեւ երկխօսութեամբ կամ փոխզիջումով:

«Ազրպէյճանական կողմը պէտք է վերաբանայ Բերձորի միջանցքը, Արդարադատութեան միջազգային դատարանի, Մարդու իրաւունքներու եւրոպական դատարանի որոշումներուն հիմամբ, ինչպէս նաեւ միջազգային մարդասիրական օրէնքի եւ 9 նոյեմբեր 2020-ի եռակողմ յայտարարութեան համահունչ կերպով: Ոչ մէկ այլ ճամբայ կրնայ զայն փոխարինել, մանաւանդ որ տակաւին շատ կանուխ է եւ անտեղի է առնել որեւէ քայլ, որ երկու կողմերուն միջեւ յարաբերութիւններու բնականոնացման նմանութիւն կրնայ ունենալ: Այս առումով այլընտրանքային ճամբաներու մասին ազրպէյճանական առաջարկները չարամիտ են եւ շնականութեան ու բացայայտ շանթաժի համազօր:

«Երբ Արցախի Հանրապետութեան ժողովուրդի իրաւունքներու եւ անվտանգութեան մասին կը խօսուի, պէտք է ի մտի ունենալ, որ անոր ինքնորոշման իրաւունքը իր առաջնահերթ ու անօտարելի իրաւունքն է, ինչպէս նաեւ անոր անվտանգութեան բանալին: Շարունակ զգուշացուցած ենք, որ Լեռնային Ղարաբաղի ժողովուրդը գոյութենական սպառնալիք կը դիմագրաւէ: Արդէն ժամանակն է այդ իրողութիւնը լուրջի առնելու», եզրափակեց ՀՅԴ Լիբանանի Հայ դատի մարմինը:

aztagdaily.com