Կալանավորելու մասին դատարանի որոշումը ո՛չ ինձ, ո՛չ Արմեն Աշոտյանին դեռ չի տրվել․ փաստաբան

ՀՀԿ փոխնախագահ Արմեն Աշոտյանին կալանավորելու մասին դատարանի որոշումը փաստաբանին դեռ չի տրամադրվել: Այս մասին ֆեյսբուքյան իր էջում գրել է Աշոտյանի փաստաբան Տիգրան Աթանեսյանը:

«ՀՀ քրեական դատավարության օրենսգրքի 288 հոդվածի 8-րդ մաս՝ 8. Որոշման (կալանքի- խմբ.) եզրափակիչ մասը հրապարակվում է դատական նիստում։ Որոշումը պատշաճ ձեւով տրվում է վարույթի մասնակիցներին ոչ ուշ, քան այն հրապարակելուց հետո՝ 3 ժամվա ընթացքում։ Որոշման պատճենը պատշաճ ձեւով ուղարկվում է այն մեղադրյալի հաշվառման հասցեով, որի գտնվելու վայրը հայտնի չէ:

Իրականություն՝ օր 4-րդ, կամ ավելի հստակ՝ 100 ժամ 8 րոպե, իսկ Արմեն Աշոտյանին կալանավորելու մասին դատարանի որոշումը ոչ ինձ, ոչ Արմեն Աշոտյանին դեռ չի տրվել:

Երկրի փնթի ու գարշահոտ կառավարչի դատական համակարգը չի կարող լինել պարտաճանաչ»,- գրել է նա:

Հիշեցնենք, որ հունիսի 16-ին Հակակոռոպցիոն դատարանը Արմեն Աշոտյանին 2 ամիս ժամկետով կալանավորելու մասին որոշում է կայացրել: