Վերաքննիչ դատարանի որոշումը մասնակի կբողոքարկվի. Վաչագան Ղազարյանի փաստաբան

ՀՀ երրորդ նախագահ Սերժ Սարգսյանի մտերիմ, թիկնազորի նախկին պետ Վաչագան Ղազարյանի փաստաբան Արմեն Հարությունյանը հայտարարությամբ է հանդես եկել, որը ներկայացնում ենք ստորեւ. «Ծանոթանալով ՀՀ Վերաքննիչ դատարանի որոշման հետ, որոշվել է այն մասնակի բողոքարկել Վճռաբեկ դատարան։ Որոշումը չի բողոքարկվի գրավի մասով։

2018 թվականի ապրիլի 9-ից հետո ՀՀ քրեական օրենսգրքի 310.1 և 314.3 հոդվածներով նախատեսված արարքները սուբյեկտի մասով ապաքրեականացվել են։ Այս կարևորագույն իրավական հարցին Վերաքննիչ քրեական դատարանը իր որոշմամբ պատշաճ գնահատական չի տվել։ Մեր կարծիքով Վճռաբեկ դատարանը իր լիազորությունների շրջանակներում պետք է կայացնի նախադեպային որոշում, դրանով իսկ ձևավորելով իրավակիրառ միատեսակ պրակտիկա։

Ինչ վերաբերում է Վաչագան Ղազարյանի համար սահմանված գրավի գումարին և այն վճարած անձի վերաբերյալ տեղեկություններին, ապա այս պահին նպատակահարմար չենք համարում հրապարակել որևէ տեղեկություն՝ ելնելով նախաքննության գաղտնիքից և բանկային գաղտնիքից։ Հաշվի առնելով հանրային հետաքրքրությունը Վաչագան Ղազարյանի գործի վերաբերյալ, հայտարարում ենք, որ մինչ օրս լրատվության տարբեր միջոցներում հրապարակված անունները և անձինք /Ալիկ Ավդալյան, Կամո Ավակումյան, Ռուբեն Թաթուլյան / որևէ կապ չունեն Վաչագան Ղազարյանի գրավի վճարման հետ։ Նշված տեղեկությունները չեն համապատասխանում իրականությանը»։

 Yerkir.am- Հիշեցնենք, որ Վաչագան Ղազարյանի խափանման միջոց կալանքը փոխվել էր 1 մլրդ դրամ գրավի դիմաց: