Նիկոլն ու իր թիմը, երբ խոսում են անպտուղ կամ մուրացող խաղաղության մասին, ավելի լավ կլինի գնան Սոթքում խոսեն այդ մասին․ Արթուր Մոսիյան

Ադրբեջանն օգտագործում է այդ տեսանյութերը որպեսզի ցույց տա, թե իբր ամեն ինչ նորմալ է և մարդիկ նորմալ գնում-գալիս են, բայց ադրբեջանը նաև շահարկում է հիվանդների տեղափոխումը, որ մարդիկ ուրիշ ճար չունեն և ստիպված հիվանդության պատճառով տեղափոխվում են։ Այս մասին Yerkir.am-ի հետ զրույցում ասաց Արցախի ԱԺ ՀՅԴ խմբակցության ղեկավար Արթուր Մոսիյանը՝ անդրադառնալով ադրբեջանցիների կողմից իրականացրած հերթական սադրանքին, երբ Հայաստան հիվանդներ տեղափոխող շտապօգնության մեքենան կանեցրել են, ստուգել և նկարահանել։

Անդրադառնալով Վաշինգտոնյան բանակցություններին Արցախի ԱԺ ՀՅԴ խմբակցության ղեկավարը նշեց, որ ոչինչ չի կարող ասել, և չգիտի թե տրված տեղեկատվությունը որքանով է համապատասխանում իրականությանը․

«Այն, որ լավ բան չենք սպասում Արարատ Միրզոյանից, դա միանշանակ է։ Ամսի 14-ի հանդիպումից էլ ակնկալիք չկա։ Մենք տեսնում ենք, որ Ադրբեջանը հերթական սադրանքն է իրականացնում և սա ճնշման ձև է։ Մենք չգիտենք սա համատեղ են պլանավորում, թե՞ Ադրբեջանը ճնշումների է ենթարկում։ Թե՛ Փաշինյանը, թե՛ իր թիմը, երբ խոսում են անպտուղ խաղաղության, կամ մուրացող խաղաղության մասին, ավելի լավ կլինի գնան Սոթքում կանգնեն և այնտեղից խոսեն խաղաղության մասին»,- ասաց նա։

Խմբակցության ղեկավարն անդրադարձավ նաև Արցախում տեղի ունեցած հանրահավաքին՝ նշելով, որ այն երիտասարդների նախաձեռնող խումբն էր կազմակերպել այն․

«Նպատակն այն էր, որ մենք չենք ենթարկվելու ոչ ոքի, որ Փաշինյանի և Ալիևի պայմանագիրը մեզ համար նշանակություն չունի, մենք ենք տերը մեր երկրի։ 2 տարի է մենք նշել ենք Մայիսի 9-ը, անկախ նրանից, որ հիմա Շուշին մերը չէ, հանրահավաքի իմաստն այն էր, որ արժևորենք այդ խորհուրդը, և եթե այդ խորհուրդը արժևորում ես, մի օր հասնում ես դրա իրականացմանը»,- ասաց պատգամավորը։

Դաշնակցական գործիչը ևս մեկ անգամ շեշտեց, որ Արացախի հարց գոյություն չունի․

«Գոյություն ունի Արցախի և Հայաստանի անվտանգության հարց։ Հայաստանի և Արցախի ժողովուրդները պետք է ոչ ասեն Նիկոլին և իր խաղաղության օրակարգին, որը տանում է Հայաստանն ու Արցախը դեպի կործանում և ստեղծեն պայմաններ Հայաստանն ու Արցախը միասնական պաշտպանելու համար»,- ավելացրեց նա։

Լ․Ա․