Ուժեղ քամիների հետևանքով հոսանքազրկվել են Մարտունիի մի քանի բնակավայրերը

Փետրվարի լույս 22-ի ողջ գիշերը գրանցված ուժեղ քամիների հետևանքով հոսանքազրկվել են Գեղարքունիքի մարզի Մարտունի համայնքի Վաղաշեն, Զոլաքար, Վարդենիկ բնակավայրերը։

Գեղարքունիքի մարզպետարանի հաղորդմամբ, ջեռուցման բացակայությամբ պայմանավորված կասեցվել է նշված բնակավայրերի դպրոցների դասապրոցեսը։

Բաց թողնված դասերը կլրացվեն շաբաթ օրը՝ փետրվարի 25-ին։

Մարզպետարանից նաև հայտնում են, որ Գեղարքունիքի մարզի ճանապարհներին իրականացվում են մաքրման և մշակման աշխատանքներ

Փետրվարի 22-ի գիշերային ժամերի ընթացքում Գեղարքունիքի մարզում գրանցվել են ուժեղ քամիներ, իսկ  բարձրլեռնային գոտիներում՝ ձնաբքեր, ինչի հետևանքով որոշ հատվածներում դժվարանցանելի վիճակ է առաջացել ճանապարհատրանսպորտային երթևեկության համար։
Բքերի և ցածր տեսանելիության պատճառով դժվարանցանելի վիճակ է ստեղծվել Վարդենյաց լեռնանցքում, Շատվան-Նորաբակ, Վերին Գետաշեն-Մադինա ավտոճանապարհներին։

Փետրվարի 22-ի ժամը 09․30-ի դրությամբ Գեղարքունիքում  բոլոր ճանապարհները հիմնականում անցանելի են, իսկ մարզի տարածքով մեկ շարունակվում են մաքրման եւ մշակման աշխատանքները։