Երկրաշարժից վնասված Հալեպի Կիլիկյան վարժարանի տնօրինությունը որոշել է փակ պահել վարժարանը

Հալեպի Կիլիկյան երկրորդական վարժարանը երկրաշարժի հետեւանքով նյութական վնասներ է կրել: «Գանձասարը» լուսանկարներ է հրապարակել:

Կայքի փոխանցմամբ, վարժարանի տնօրինությունը որոշել է փակ պահել վարժարանի դռները՝ մինչեւ որ համապատասխան մարմինները ստուգեն կառույցի կայուն մնալու հավանականությունն ու անհրաժեշտ վերանորոգումներ կատարեն։

Հիշեցնենք, որ երեկ վաղ առավոտյան 7,4 մագնիտուդ ուժգնությամբ երկրաշարժ է տեղի ունեցել Քահրամանմարաշ նահանգում, որի հետևանքով զոհվել է 2921, վիրավորվել՝ 15834 մարդ։ Տուժել են նաև սիրիական Հալեպ, Լաթաքիա, Համա և Տարտուս նահանգները: Այնտեղ, վերջին տվյալներով, զոհվել է 711, վիրավորվել՝ 1431 մարդ։

Երեւանի ժամանակով մոտավորապես 14:25-ին տեղի է ունեցել ևս մեկ երկրաշարժ՝ 7,6 մագնիտուդով։ Թուրք սեյսմոլոգների տվյալներով՝ ամենաշատ տուժած քաղաքներից մեկը Գազիանթեփն է։

Ավելի ուշ փորձագետները երեք տասնյակ հետցնցումներ են գրանցել, իսկ օրվա կեսին՝ նոր հզոր ցնցումներ՝ 7,7 մագնիտուդով։ Երկրաշարժը զգացվել է Լիբանանում, Իրաքում, Իսրայելում, Վրաստանում, Աբխազիայում, փոքր հետցնցումներ են գրանցվել Սոչիում։