Հարավային Օսիայի նախագահը Ռուսաստանի հետ միավորվելու վերաբերյալ հանրաքվեի ամսաթիվ է նշանակել

Հարավային Օսիայի նախագահ Անատոլի Բիբիլովը կարգադրել է հուլիսի 17-ին չճանաչված երկրում հանրաքվե անցկացնել Ռուսաստանի հետ միավորման վերաբերյալ։ Այս մասին ասվում է հանրապետության ղեկավարի` մայիսի 13-ի հրամանագրում։

Հանրաքվե հայտարարելու որոշումն ընդունվել է տարածաշրջանի ղեկավարի կողմից՝ «առաջնորդվելով Ռուսաստանի հետ վերամիավորվելու` Հարավային Օսիայի Հանրապետության ժողովրդի պատմական ցանկությամբ և համաձայն հանրապետության Սահմանադրության 50-րդ հոդվածի 16-րդ կետի»,- ասվում է հրամանագրում։

Քվեաթերթիկը կներառի մեկ հարց՝ «Դուք սատարո՞ւմ եք Հարավային Օսիայի Հանրապետության և Ռուսաստանի միավորմանը»։

ՏԱՍՍ գործակալությունը, հղում անելով Բիբիլովի վարչակազմին, իր հերթին, հայտնել է, որ Հարավային Օսիայի Գերագույն դատարանն արդեն քննարկել է հանրաքվեի անցկացման համար անհրաժեշտ փաստաթղթերի փաթեթը և դրական կարծիք հայտնել նախաձեռնության վերաբերյալ։