Ղազախստանում կարտադրվեն թուրքական ANKA անօդաչու թռչող սարքեր

Թուրքական ANKA հարվածային անօդաչու թռչող սարքերը կարտադրվեն Ղազախստանում։ Այս մասին հայտնել է անօդաչու թռչող սարք ստեղծող թուրքական Türk Havacılık ve Uzay Sanayi AŞ (TUSAŞ) օդատիեզերական ընկերությունը. տեղեկացնում է  Anadolu-ն։

Ընկերությունը հիշեցրել է, որ անցյալ տարի ղազախական կողմի հետ պայմանագիր է կնքվել Կենտրոնական Ասիայի հանրապետություն ANKA անօդաչու թռչող սարքերի մատակարարման մասին։

Օրերս Ղազախստանի պատվիրակության՝ Անկարա կատարած այցի շրջանակներում TUSAŞ-ի և Kazakhstan Engineering-ի միջև ստորագրվել է համագործակցության նոր համաձայնագիր՝ արդեն Ղազախստանում ANKA անօդաչու թռչող սարքերի համատեղ արտադրության վերաբերյալ։

Անօդաչու թռչող սարքերի սպասարկումն ու վերանորոգումը նույնպես կիրականացվի այս երկրում ստեղծվելիք համատեղ ձեռնարկությունում:

Այսպիսով՝ Ղազախստանը դարձավ առաջին օտարերկրյա երկիրը, որտեղ կհիմնադրվի ANKA անօդաչու թռչող սարքերի արտադրությունը։

TUSAŞ-ի գործադիր տնօրեն Թեմել Քոթիլն իր հպարտությունն է հայտնել ANKA անօդաչու սարքերի նկատմամբ օտարերկրյա գործընկերների աճող հետաքրքրության կապակցությամբ։ «Նոր համաձայնագիրը ավելի կամրապնդի բարեկամական կապերը եղբայրական Ղազախստանի հետ», - ընդգծել է նա: