ՏԵՍԱՆՅՈՒԹ․ Նիկո՛լ, կա՛մ դու արագ, անցնցում հրաժարական ես տալիս, կա՛մ մենք երկիրը կանգնեցնում ենք․ Իշխան Սաղաթելյան

Ֆրանսիայի հրապարակում «Դիմադրություն» շարժման հանրահավաքի ժամանակ ՀՅԴ Հայաստանի Գերագույն մարմնի ներկայացուցիչ, ԱԺ փոխնախագահ Իշխան Սաղաթելյանը հրապարակեց այն 4 հասցեները, որտեղից առավոտյան ժամը 12։00-ին պետք է անհնազանդության երթեր շարժվեն և պարալիզացնեն Երևանը՝ հայտնում է Yerkir.am-ը։

1․ Գայի պողոտա՝ Մեգա մոլի դիմացից,

2․ Րաֆֆու փողոց՝ Անդրանիկի արձանի մոտից,

3․ 15 թաղամաս՝ Չավուշի արձանի մոտից,

4․ Կայարան՝ Սասունցի Դավիթ արձանի մոտից․

այս հասցեներից ժամը 12։00 երթերը շարժվելու են և պարալիզացնեն քաղաքը։

Մինչ այդ վաղ առավոտից տարբեր անհնազանդության ակցիաներ են լինելու։

Իսկ երեկոյան՝ ժամը 19։00 Ֆրանսիայի հրապարակում աշխատանքն ամփոփվելու է հանրահավաքով։

Վաղը նաև հայտարարված է դասադուլ և գործադուլ։

Ակցիայի յուրաքանչյուր մասնակից իր հետ պետք է փողոց բերի մեկ քաղաքացի։

«Մեկ շաբաթում կարողացանք մեր ժողովրդին ոտքի հանել․ ուրեմն, Նիկո՛լ, դու ոչ միայն Ալիևին ես պարտվել, այլ նաև պարտվել ես սեփական ժողովրդին, ով 4 տարի առաջ քեզ բերեց իշխանության, իսկ դու այդ ժողովրդին բերեցիր մահ, զոհ և հայրենիքի կորուստ։ Եվ  հիմա այդ ժողովուրդն ասում է՝ Նիկո՛լ, գնա՛, պարզապես հեռացիր։

Ձեր բազմահազարանոց երթը ինձ իրավունք է տալիս հայտարարելու․ Նիկո՛լ, կա՛մ դու արագ, անցնցում հրաժարական ես տալիս, կա՛մ մենք երկիրը կանգնեցնում ենք»,-ասաց Իշխան Սաղաթելյանը։

Նիկոլին հեռացնելու բանաձևը, նրա խոսքով, հստակ է․ պետական կառավարման համակարգը պետք է կանգնեցնել։

Պետք է բոլորը հասկանան, որ Նիկոլի մեկ օր ավելի մնալը չի բխում մեր երկրի շահերից։

Հոգնել չկա, նահանջ չկա, մինչև վերջ։

Մանրամասն՝ տեսանյութում․