ԱՄՆ կոնգրեսականները կանաչ լույս են տվել Թուրքիային F-16 վաճառելու համար

ԱՄՆ Կոնգրեսի մի շարք անդամներ Թուրքիային F-16 կործանիչներ վաճառելու համար կանաչ լույս են տվել՝ Ուկրաինայում իրավիճակի վերաբերյալ Անկարայի միջնորդական ջանքերից հետո. հայտնում է A Haber հեռուստաալիքը։

«Կոնգրեսի շատ անդամներ, որոնք նախկինում ջանքեր են գործադրել Թուրքիային F-35 ծրագրից հեռացնելու համար, կանաչ լույս են վառել Թուրքիային F-16-ի վաճառքի համար՝ Ուկրաինայի ռազմական գործընթացում նրա դերից հետո: Վերջին շրջանը նվազեցրել է Կոնգրեսում հնարավոր առարկությունները Անկարային F-16-ների վաճառքի հետ կապված»,- հաղորդում է հեռուստաալիքը։

ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի նախագահ Գրեգորի Միքսն ընդգծել է Թուրքիայի հետ ԱՄՆ-ի աշխատանքի անհրաժեշտությունը։ «Թուրքիան որոշ քայլեր է արել ճիշտ ուղղությամբ, թեև որոշ բաներ մեզ ժամանակ առ ժամանակ անհանգստացնում են, կան ոլորտներ, որտեղ մենք պետք է աշխատենք Թուրքիայի հետ» - նրա խոսքերն է մեջբերում հեռուստաալիքը։

Իր հերթին, Սենատի արտաքին հարաբերությունների հանձնաժողովի հանրապետական առաջնորդ Ջիմ Ռիշն ասել է, որ «Թուրքիան արժանահավատ փաստարկներ է ներկայացրել, թե ինչու են իրեն պետք F-16-ները»:

Անցյալ հոկտեմբերին Թուրքիան ԱՄՆ-ին խնդրել էր իրեն վաճառել 40 Lockheed Martin F-16 կործանիչ և մոտ 80 արդիականացման հավաքածու՝ իր ռազմական ինքնաթիռների համար։