Թուրքական պատվիրակությունն ԱՄՆ-ում կքննարկվի Թուրքիային Patriot տեսակի պաշտպանական համակարգեր վաճառելու հարցը

Թուրքիայի արտաքին գործերի փոխնախարար Սեդան Օնալի գլխավորած պատվիրակությունը մեկնել է  ԱՄՆ, որտեղ կհանդիպի մի շարք պաշտոնյաների հետ և կքննարկի Սիրիայի ճգնաժամը, գյուլենականների ու Քրդական բանվորական կուսակցության դեմ պայքարը, ինչպես նաև Patriot պաշտպանական համակարգերի ձեռք բերման ու Եփրատ գետի արևելյան հատվածում կատարվելիք գործողության հարցերը: Թուրքական aksam.com.tr կայքը տեղեկացնում է, որ, բացի վերոնշյալից, ուշադրության կենտրոնում կլինի նաև «Իսլամական պետություն» ահաբեկչական խմբավորման զինյալների դեմ պայքարի և տարածաշրջանում անվտանգության գոտի ստեղծելու հարցը:

Ավելի վաղը Եփրատի արևելյան հատվածում կատարվելիք գործողության վերաբերյալ Թուրքիայի նախագահ Ռեջեբ Թայիփ Էրդողանն ասել էր, որ իրենք չեն ցանկանում ապրել սպառնալիքի տակ, և շեշտել էր, որ ԱՄՆ-ը չպետք է օգնի տեղի քրդական ահաբեկչական ուժերին: Այնտեղ առկա է նաև ԻՊ ահաբեկիչների վտանգը, և նրանց դեմ պայքարում Թուրքիան ԱՄՆ-ից պահանջում է նյութատեխնիկական բավարար չափով օգնություն:

Քննարկման առանցքային թեմաներից է նաև ԱՄՆ-ի կողմից Թուրքիային Patriot տեսակի պաշտպանական համակարգեր վաճառելու հարցը: Այդ մասին պայմանավորվածությունն ԱՄՆ-ը հաստատել  է 2018 թվականի դեկտեմբերի 19-ին: