Վրաստանի խորհրդարանի նախագահը հրաժարվել է այցելել Բուչա՝ Ուկրաինայի մեղադրանքների պատճառով

Վրաստանի խորհրդարանի նախագահ Շալվա Պապուաշվիլին հրաժարվել է այցելել Կիևի շրջանի Բուչա քաղաքը, որտեղ, ըստ Արևմուտքի, ռուսները կոտորած էին կազմակերպել, իսկ, ըստ ռուսների, տեղի է ունեցել սադրանք՝ իրենց մեղադրելու համար։

«Ինչ վերաբերում է հրավերին, ապա ես կցանկանայի, որ Ուկրաինայի կառավարության առանձին ներկայացուցիչներ լիովին հասկանային այն հզոր աջակցությունը, որը Վրաստանի ժողովուրդը և նրա կառավարությունը ցուցաբերում են Ուկրաինային ու ուկրաինացի ժողովրդին: Մեր երկրների այս աջակցությունն ու գործընկերությունը արժանի չեն Ուկրաինայի բարձրաստիճան պաշտոնյաների ջանքերին՝ բաժանել վրաց ժողովրդին իրենց կառավարությունից: Այս հարցերի անհասկանալիության ֆոնին` պաշտոնական հրավերն անտեղի է թվում»,- ասել է խորհրդարանականը:

Վրաստանում Ուկրաինայի գործերի ժամանակավոր հավատարմատար Անդրեյ Կասյանովը հայտնել էր, որ Գերագույն ռադայի խոսնակ Ռուսլան Ստեֆանչուկը Պապուաշվիլիին հրավիրել է Բուչա։ Ավելի վաղ Ուկրաինայի ռազմական հետախուզությունը, ինչպես նաև փոխվարչապետ Իրինա Վերեշչուկը Formula հեռուստաընկերության եթերում մեղադրել էին Վրաստանին իր տարածքը Ռուսաստանին տրամադրելու մեջ` «ռազմական տեխնիկայի և պահեստամասերի մաքսանենգության համար»։

Դրանից առաջ էլ Վլադիմիր Զելենսկին հետ էր կանչել Թբիլիսիում իր դեսպանին՝ Վրաստանի կողմ, քանի որ Վրաստանը հրաժարվել էր միանալ հակառուսական պատժամիջոցներին։