Իսրայելի կառավարությունը կորցրել է մեծամասնությունը խորհրդարանում

Իսրայելցի պատգամավորը լքել է կառավարության իշխող կոալիցիան կրոնական վեճի պատճառով, որը զրկել է վարչապետ Նաֆթալի Բենեթին խորհրդարանում մեծամասնությունից. հայտնում է AP-ն։

Իդիթ Սիլմանի հեռանալը բարձրացնում է նոր խորհրդարանական ընտրությունների հնարավորության հարցը Բենեթի կառավարության՝ իշխանության գալուց մեկ տարի անց:

Բենեթի կրոնական-ազգայնական «Յամինա» կուսակցությունից Իդիթ Սիլմանը դեմ է եղել պետական հիվանդանոցներում խմորիչով հացի և սննդի բաշխմանը, ինչը Զատիկի ժամանակ կրոնական ավանդույթների խախտում է. ասել է «Կան» հանրային հեռարձակողը:

Բենեթի՝ ութ քաղաքական կուսակցություններից կազմված կոալիցիան՝ սկսած իսլամիստներից, արմատական ազգայնականներից մինչև լիբերալներ, միավորված բացառապես նախկին վարչապետ Բենիամին Նեթանյահուի դեմ պայքարելու համար, այժմ ունի 60 տեղ Կնեսետում` 120-ից:

Իսրայելում երկու տարվա ընթացքում, տեւական քաղաքական ճգնաժամի պայմաններում, 4 անգամ ընտրություններ են կայացել։ Վերջապես հունիսին Բենեթը և նրա դաշնակիցները տապալեցին Բենիամին Նեթանյահուին 12 տարվա իշխանությունից հետո՝ ստեղծելով անհավանական դաշնակիցների կոալիցիա:

Նեթանյահուն, որն այժմ ընդդիմության առաջնորդն է, շնորհավորել է Սիլմանին և «ողջունել նրա վերադարձը տուն՝ ազգայնականների ճամբար»։