ԱՄՆ կոնգրեսականները Պետդեպարտամենտին կոչ են անում միջոցներ ձեռնարկել Ալիևի ռազմատենչ գործողությունների դեմ

ԱՄՆ Կոնգրեսի հայկական հարցերով հանձնաժողովի համանախագահները Պետդեպարտամենտին կոչ են արել օգտագործել դիվանագիտական բոլոր գործիքները Ադրբեջանի նախագահի ռազմատենչ գործողությունները դադարեցնելու և նրան բանակցային սեղանի շուրջը վերադարձնելու համար։

Կոնգրեսի հայկական հարցերով հանձնաժողովի համանախագահներ Ֆրենկ Փալոնը, Գաս Բիլիրակիսը, Ջեկի Սփայերը, Դեյվիդ Վալադաոն և Ադամ Շիֆն իրենց հայտարարության մեջ, մասնավորապես, նշել են. «Մենք դատապարտում ենք Ադրբեջանի վերջին գործողությունները Լեռնային Ղարաբաղում»:

Կոնգրեսականներն ընդգծել են, որ ադրբեջանական զորքերի առաջխաղացումը Արցախի Հանրապետության տարածքում, նրանց կողմից անօդաչու թռչող սարքերի կիրառումը և այս տարածքի խաղաղ բնակչությանը բնական գազի հիմնական աղբյուրից զրկելը 2020 թվականի հրադադարի խախտում է և վտանգ է ներկայացնում անմեղ մարդկանց կյանքի համար:

«Միացյալ Նահանգները չպետք է աչք փակի նման ընդգծված վտանգավոր գործողությունների վրա, մենք պետք է ամեն ինչ անենք այս տարածաշրջանում խաղաղություն և կայունություն ապահովելու համար։ Մենք կոչ ենք անում Պետդեպարտամենտին՝ օգտագործել բոլոր դիվանագիտական գործիքները՝ Ադրբեջանի նախագահ Իլհամ Ալիևի ռազմատենչ գործողությունները դադարեցնելու և նրան  խաղաղ գործընթացի շուրջ բանակցություններին՝ ԵԱՀԿ Մինսկի խմբի համանախագահների հովանու ներքո, վերադարձնելու համար»,- ասել են կոնգրեսականները հայտարարության մեջ։