Մարդկային ցեղը երբեք չի բախվել այսքան մեծ սպառնալիքների. ՄԱԿ-ը կոչ է անում բնական աղետների նվազեցման ակտիվ միջոցներ ձեռնարկել

ՄԱԿ-ը համաշխարհային հանրությանը կոչ է արել բնական աղետների նվազեցման ակտիվ միջոցներ ձեռնարկել։ Այս մասին տեղեկացնում է ՏԱՍՍ-ը`վկայակոչելով չորեքշաբթի Ժնևում հրապարակված` ՄԱԿ-ի տարերային աղետների վտանգի նվազեցման վարչության զեկույցը:

Զեկույցի համաձայն`ռիսկերը պարբերական են դառնում, քանի որ մեկ աղետը կարող է այլ աղետի պատճառ դառնալ՝ գլոբալ տնտեսության, մարդու ու բնության սերտ համագործակցության պատճառով. սա պահանջում է կառավարություններից` մշակել դրանց կանխման ազգային ռազմավարություններ:

ՄԱԿ-ի գլխավոր քարտուղարի` տարերային աղետների գծով հատուկ ներկայացուցիչ Մամի Միցուտորիի խոսքով`այլևս խնդրի ձգձգման հնարավորություն չկա: «Եթե շարունակենք ապրել այնպես, ինչպես ապրել ենք մինչ այժմ, մեր գոյությունը կդրվի հարցականի տակ: Մարդկային ցեղը երբեք չի բախվել այսքան մեծ սպառնալիքների: Վերջին 20 տարվա ընթացքում ծայրահեղ բնական երևույթների քսանապատիկ ավելացումը ևս մեկ ապացույցն է այն բանի, որ մեզ հարկավոր է նոր մոտեցում ցուցաբերել աղետների ռիսկի հիմնախնդիրը կարգավորելու գործում, եթե, իհարկե, ցանկանում ենք հասնել վնասի նվազեցման»,- նշել է նա: